Ibivugwa n’umukunzi wa m23 ku ntambara uyu mutwe urimo muri Kivu y’Epfo.
Umwe mu Banye-Kongo bari hanze y’igihugu cyabo, wavuze ko ari umukunzi wa M23 na Twirwaneho, yatanze ubutumwa burimo inama ashaka guha abarwanyi b’uyu mutwe uheruka gufata umujyi wa Goma.
Ni ubutumwa buri munyandiko, akaba yabunyujije mu bwanditsi bwa Minembwe.com, aho yagize ati: “Mwiriwe abandi mwaramutse? Ngize igihe nkurikirana ibibera i wacu. Iyo mvuze iwacu mba mvuze muri Kivu Yaruguru n’iy’Epfo. Njyewe uvuga ibi ndi umukunzi wa M23 na Twirwaneho.”
Yavuze ko kuri ubu atuye muri diasipora, kandi ko adashaka ko amazina ye aja hanze, ku mpamvu z’umutekano we.
Yakomeje agira ati: “Umusanzu wanjye w’ibitekerezo, nsubiye inyuma mu 2017, wabonaga intambara ibera i wacu(Mulenge ) yatangiye ari iya politiki, kandi n’umvaga izakemurwa vuba bidatinze, kandi ko izakemurwa n’imbaraga za politiki. Ariko Igitangaje mu 2021 na 2022, ubwo yatangiraga muri Kivu Yaruguru, perezida Félix Tshisekedi ni nabwo yahise yiyambaza ingabo z’u Burundi, Wazalendo na FDLR, intambara yahise ifata indi sura. Iba iya moko (Hutu na Tutsi), nubwo impande zose batabigaragaza.”
Uyu mukunzi wiyise uwa M23 na Twirwaneho yavuze ko ibyo yavuze haruguru ari byo byatumye atekereza guha umutwe wa M23 inama.
Maze agira ati: “Rero, ndagira ngo mpe M23 inama. Nyuma y’ifatwa rya Goma na Minova, birabasaba gutekereza kabiri. Uburyo mu koresha kugira ngo mubashe guhindura ibyo Tshisekedi yagezeho. muri dipolomasi.”
“Reka mbabwire, Abazungu bashigikira uruhande rufite imbaraga. Rero, nimukore cyane kugira ngo mwigarure imitima y’Abanyamulenge bashutswe na Tshisekedi. Ikindi mwigarurire imbaraga z’urubyiruko.”
Yavuze ko kugira ngo ibyo M23 ibigereho, biyisaba gutabara abaturage ba Banyamulenge bari mu misozi miremire y’Imulenge bagabwaho ibitero bya FARDC, FDLR na Maï-Maï umunsi ku wundi. Ahamya ko ibyo bizafasha uyu mutwe wa M23 guhuza imbaraga na Twirwaneho, maze ngo ibyo bizatuma bafata igice cyose cy’imisozi miremire y’Imulenge, ubundi Umunyamulenge wese ahari, azahita yiyumvamo uyu mutwe wa M23 na Twirwaneho.
Yavuze kandi ko ibyo bizafasha M23 na Twirwaneho gusenya imitwe yitwaje intwaro ikorana byahafi n’ingabo za perezida Félix Tshisekedi, iyahoraga yica Abanyamulenge ikanabasenyera.
Avuga kandi ko ibyo bizatuma u Burundi bwahoraga bufasha ingabo z’iki gihugu cya Congo na FDLR bucika intege.
Yanaboneyeho kandi kuvuga ko iki gice cy’imisozi miremire, gifite uburyo bw’u rugomba, ahanini ngo kuko ku gifata bizaca intege Leta y’u Burundi.
Avuga ko mu gihe abarwanyi b’uyu mutwe wa M23 bakomeza umuhanda wa Bukavu-Uvira, bishobora kuzabagora, ngo kuko we abona ko bizaha General Pacifique Masunzu imbaraga, gukomeza kwiyambaza u Burundi na Wazalendo bazaba bava mu misozi miremire. Bityo abasaba kubanza gufata imisozi y’i Mulenge.
Yarangije ashimira umuryango wa M23 na Twirwaneho.
Ati: “Ndabakunda, muri abagabo, mwanze gusuzugurwa. Imana izabahe intsinzi y’ibihe bidashyira. Murakoze mu horane Imana.”
