Abanyamulenge Bafungiwe i Kalemie Baratabarizwa, Barasaba Ubutabera Mpuzamahanga
Imiryango y’Abanyamulenge imaze iminsi ifungiwe mu mujyi wa Kalemie, mu Ntara ya Tanganyika muri Repubulika Iharanira Demokarasi ya Congo, iratabaza isaba ubutabera n’ubutabazi bwihuse. Ibi bije nyuma y’uko inzira zose zemewe n’amategeko imbere mu gihugu zinaniwe gutanga igisubizo ku kibazo cy’ifungwa ryabo.
Amakuru aturuka muri iyo miryango avuga ko mu byumweru bibiri bishize ari bwo abo bantu bafashwe n’ingabo za FARDC, bakaba barafashwe bazira gusa ko ari Abatutsi, nta kindi cyaha bashinjwa. Muri bo harimo Mazimpaka Sengoga, wafatiwe mu isoko rya Kalemie aho yari yagiye kugura ibitunga umuryango we.
Abandi babiri, Karisa Ruhamanya na Nyamuhoza, na bo bafatiwe mu mujyi wa Kalemie, bose bakaba barafashwe bazira gusa inkomoko yabo n’uko baremwe, nk’uko imiryango yabo ibitangaza.
Abagize iyo miryango baganiriye na Minembwe Capital News batangaje ko Mutualité y’Abanyamulenge ikorera i Kalemie yagerageje inshuro nyinshi gushaka uko abo bafunzwe barekurwa binyuze mu nzira zemewe n’amategeko, ariko izo ngamba zose zikaba zararangiye nta musaruro zitanze.
Abanyamulenge batuye muri Repubulika Iharanira Demokarasi ya Congo bamaze igihe kirekire bagaragaza akarengane n’ivangura bakorerwa, cyane cyane mu bijyanye n’umutekano, uburenganzira bwa muntu n’ubutabera. Nyamara, imiryango yabo ivuga ko amahanga yakomeje kudaha agaciro ibyo bibazo, akabirebera nk’aho atabyumva.
Imiryango y’aba bafunzwe isaba imiryango mpuzamahanga iharanira uburenganzira bwa muntu, imiryango itabara imbabare n’inzego za Loni kwinjira muri iki kibazo byihuse, hagamijwe ko abo bantu barekurwa, kuko nta kindi cyaha bashinjwa uretse inkomoko yabo. Igaragaza ko nta gihugu kigomba gufunga abaturage bacyo bazira ubwoko bwabo, kandi ko uburenganzira bwo kubaho mu bwisanzure no kurengerwa n’amategeko bugomba kuba rusange kuri bose.
