Abasivile barashwe n’umusirikare mu Minembwe umwe ahasiga ubuzima.
Umusirikare wo mu ngabo za Repubulika ya demokarasi ya Congo, wo muri brigade ya 21 ikorera mu Minembwe mu ntara ya Kivu y’Amajyepfo, yishe arashe umwana w’umukobwa akomeretsa n’umuhungu wari kumwe n’uwo mukobwa. Bombi bakaba ari abo mu bwoko bw’Abashi.
Amakuru ava muri ibyo bice avuga ko iryo raswa ry’abo basivile byabaye ahagana isaha ya saa tanu z’ijoro ryo ku wa kane tariki ya 16/01/2025.
Nk’uko iyi nkuru ibisobanura ibyo byabereye neza muri centre ya Minembwe ahatuwe n’Abashi benshi babacuruzi.
Bikavugwa ko uwo muhungu yari yararanye n’uriya mwana w’Umukobwa, bombi bakaba bari mu kigero cy’imyaka y’amavuko iri hejuru ya 25.
Nyuma y’aho bari bamaze kuryama, Umusirikare wo mu ngabo za FARDC yarabinjiranye akoresheje imbaraga, kuko byavuzwe ko yakubise umuryango urakinguka, ubundi ahita yinjira ni bwo yahise arasa umukobwa arapfa umuhungu we arakomereka bikabije.
Kuri ubu uwakomeretse ari mu bitaro bikuru bya Minembwe aho ari kwitabwaho, ndetse bikavugwa ko ari gushakirwa transfer imujana i Bukavu ku murwa mu kuru w’i Ntara ya Kivu y’Amajy’epfo, kugira ngo akomeze kwitabwaho.
Mu gihe uriya musirikare we wicanye yahise atabwa muri yombi, nawe akaba azoherezwa Uvira kugira ngo aryozwe ibyo yakoze, nk’uko iyi nkuru dukesha inzego z’umutekano mu Minembwe ziyavuga.
