Afande Ngarukiye Ni Muzima-Byanyomojwe n’Abari mu Minembwe
Amakuru mashya aturuka mu Minembwe, mu Ntara ya Kivu y’Amajyepfo, mu gace kagenzurwa n’umutwe wa Twirwaneho ahaherutse kwibasirwa n’ibitero by’indege za gisirikare cya Repubulika ya Demokarasi ya Congo (RDC), yemeza ko Afande Sam Ngarukiye, umupasiteri n’umuyobozi mu bya gisirikare, akiri muzima.
Ibi bitangajwe nyuma yo kunyomoza amakuru yakwirakwije n’abegamiye ku butegetsi bwa Perezida Félix Tshisekedi, bavugaga ko Ngarukiye yaba yacitse amaguru yombi nyuma yo kuraswa n’indege ya gisirikare yo mu bwoko bwa Sukhoi-25.
Umwe mu baturuka mu gace ka Minembwe waganiriye na Minembwe Capital News yagize ati:
“Abavuze ko Afande Sam Ngarukiye yacitse amaguru yombi ni ababeshyi bakorera mu kwaha kwa Leta ya Tshisekedi. Ni ibinyoma. Ni muzima. Nibyo, yavunitse ukuguru gake kubera yahimiranye, ariko si ibintu bikomeye nk’uko byavuzwe.”
Aya makuru y’ibihuha yakwirakwijwe ku wa Gatanu tariki ya 28/11/2025, nyuma y’uko indege ya Sukhoi-25 itereye ibisasu mu gace ka Gakangala hafi ya centre ya Minembwe, ariko igafata ubusa.
Abaturage bo mu Minembwe bakomeje kugaragaza impungenge ku mutekano wabo n’ingaruka z’ibitero by’indege bikomeje gukorwa mu bice byegereye imihana y’abasivile, cyane cyane muri ibi bihe by’imvururu zishyamiranyije ingabo za Leta n’imitwe irwanira muri ako karere.
