AFC/M23 Yatangaje Agahenge k’Urugamba, Ishinja Leta ya Kinshasa Kurenga ku Masezerano no Gukomeza Kugaba Ibitero ku Baturage
Ihuriro rya Alliance Fleuve Congo (AFC/M23) ryamenyesheje ko ryafashe icyemezo cyo gushyiraho agahenge k’uruhande rumwe, mu rwego rwo kugaragaza inshingano n’ubushake bwo gutanga amahirwe afatika yo kugarura amahoro arambye mu Burasirazuba bwa Repubulika ya Demokarasi ya Congo (RDC).
Icyakora, iri huriro rivuga ko ubutegetsi bwa Kinshasa bukomeje gushimangira umugambi wo guhohotera no kwica abaturage, baca ku ruhande amasezerano, mu buryo bweruye bunyuranyije n’amategeko mpuzamahanga arengera ikiremwamuntu.
Nk’uko AFC/M23 ibitangaza, ingabo n’imitwe bafatanyije ya Leta ya Kinshasa zikomeje kugaba ibitero bigambiriye ku birindiro by’iri huriro, ndetse no ku duce dutuwe cyane n’abaturage, bigira ingaruka zikomeye ku mutekano w’abasivili.
Rikomeza rivuga ko guhera saa kumi n’imwe za mu gitondo (5h00), izo ngabo zagabye ibitero hifashishijwe drones n’ingabo zo mu mazi, byibasira ahatuwe cyane n’ibirindiro bya AFC/M23 i Makobola, biturutse mu gace ka Baraka.
Saa kumi n’ebyiri n’igice (5h30), Minembwe yagabweho ibitero byifashishije drones n’imbunda ziremereye, bitera ubwoba n’akaga gakomeye mu baturage b’abasivili.
AFC/M23 ivuga ko ishyize abaturage ba Congo n’abafatanyabikorwa mpuzamahanga ku ruhande, ibasaba kwitwararika kurenga ku gahenge, ndetse n’ikorwa ry’ihohoterwa rikomeje kwibasira abaturage.
Nk’uko iri huriro ribishimangira, ibi bikorwa byerekana mu buryo budashidikanywaho ko ubutegetsi bwa Kinshasa butagamije amahoro n’umutekano w’abasivili, ahubwo bukomeje gutsimbarara ku mvururu n’umuco wo kudahana, bikarushaho kongera ubusumbane n’imibabaro mu gihugu.
Iri tangazo risoza risaba amahanga n’imiryango mpuzamahanga kongera imbaraga mu guhagarika ihohoterwa, gushyira igitutu ku bayobozi babigiramo uruhare, no gushyigikira inzira ya politiki ishingiye ku biganiro byimbitse bigamije amahoro arambye.
