AFC/M23 yatanze impuruza ku bwicanyi ingabo z’u Burundi, FDLR na Wazalendo bari gukorera Abanyamulenge.
Ihuriro rya Alliance Fleuve Congo, AFC/M23 rikorera mu Burasirazuba bwa Repubulika ya demokarasi ya Congo, ryatanze impuruza ribwira umuryango mpuzamahanga ko ingabo z’u Burundi, n’iza RDC n’imitwe yitwaje intwaro ya Wazalendo na FDLR bari kwica abasivili babanyamahanga n’abandi muri Kivu y’Amajyepfo.
Ku mugoroba w’ahar’ejo ku itariki ya 28/08/2025, ni bwo iyi mpuruza yatanzwe n’umuvugizi wa AFC/M23, Lawrence Kanyuka, wavuze ko FDLR, FARDC, ingabo z’u Burundi na Wazalendo ndetse n’abacanshuro bari kugaba ibitero mu bice bituwe n’Abanyamulenge no mu bindi bice babohoye bigatwara ubuzima bwabo.
Yavuze ko ibi bitero byatangiye kubagabwaho tariki ya 27/08/2025, mu bice bya Minembwe, Mikenke no muri teritware ya Kalehe, nka Nyabibwe na Katana.
Kanyuka yakomeje avuga ko uru ruhande rwa Leta mu kugaba biriya bitero rwakoresheje intwaro ziremereye zirimo indege zitagira abapilote nka drone na Kamikaze n’izindi mbunda za rutura.
Yanavuze ko ibi bitero byagejeje ku munsi w’ejo ku wa kane tariki ya 28/08/2025.
Uyu muvugizi wa AFC/M23 yavuze kandi ko bo bahagurukiye kurwanya amabi yose akorwa n’uruhande rurwanirira Leta ya RDC.
Ashimangira ko AFC/M23 idashobora kwihanganira ibikomeje gukorwa na ziriya ngabo z’u Burundi iza RDC n’imitwe yitwaje intwaro isanzwe ikorana nazo.
Ibyo bikozwe mu gihe Abanyamulenge bakomeje kwibasirwa n’ibitero bikomeye mu bice bitandukanye byo mu misozi miremire y’i Mulenge, ni mu gihe bashinjwa ko ari Abanyarwanda kubera ko bavuga ururimi rw’ikinyarwanda.