AFC/M23 Yemeje ko Abaturage Bari Kwicwa n’Ibisasu Bikomeye Biva mu Burundi
Ihuriro rya Alliance Fleuve Congo (AFC/M23) ryasohoye itangazo rigenewe abanyamakuru kuri uyu wa Gatanu tariki ya 05/12/2025, riburira amahanga n’abafatanyabikorwa mpuzamahanga ko abaturage bo mu burasirazuba bwa Repubulika ya Demokarasi ya Congo bakomeje guhitanwa n’ibisasu bikomeye.
Muri iri tangazo, AFC/M23 ivuga ko mu minsi irenga itatu ishize, ingabo za FARDC zifatanyije n’iza FDLR ndetse n’ingabo z’u Burundi zikomeje kurasa ibisasu bikomeye mu bice bituwemo n’abasivili mu kibaya cya Rusizi, muri teritware ya Uvira. Ibi bisasu bikomeje guhitana abaturage b’inzirakarengane barimo abana, abagore n’abasaza, bikangiza ibigo nderabuzima, ibikorwa remezo n’imitungo y’abaturage.
AFC/M23 yamaganye ibi bikorwa isobanura ko ari iterabwoba rishingiye kuri Leta, ishyira mu kaga uburenganzira bw’ikiremwamuntu kandi rikabangamira amahoro n’umutekano w’akarere. Iri huriro rikomeza rivuga ko ibisasu biri kuraswa bivugwa ko bituruka i Bujumbura bibangamiye n’umutekano w’ibindi bihugu byo mu karere, bityo bikaba byateza intambara ishobora kwaguka.
Iri huriro risaba amahanga n’imiryango mpuzamahanga guhagurukira iki kibazo bidatinze, kurengera ubuzima bw’abasivili no kwamagana ibikorwa byose byo kubatoteza no kubashyira mu bibazo bishingiye ku ivangura.
AFC/M23 isoza ivuga ko izakomeza guharanira amahoro, uburenganzira bwa muntu n’iterambere rirambye, inibutsa ko abaturage bo mu karere k’Afurika yo Hagati bafite uburenganzira ntayegayezwa bwo kubaho mu mahoro, mu bwisanzure no mu mutekano usesuye.
