AFC/M23 Yigambye Gukubuta ahababaza Ingabo z’u Burundi mu Ntambara Ikomeye i Kasika
Umutwe wa AFC/M23* watangaje ku mugaragaro ko Ingabo zayo zahaye isomo rikomeye iz’u Burundi, ubwo impande zombi zahuriraga mu mirwano ikomeye yabereye mu gace ka Kasika, gaherereye muri teritwari ya Mwenga mu Ntara ya Kivu y’Amajyepfo.
Ibi byemejwe na Lt. Col. Willy Ngoma, umuvugizi w’ingabo za AFC/M23, zizwi nka ARC (Armée Révolutionnaire du Congo), mu butumwa yanyujije ku rubuga rwe rwa X (Twitter).
Yagize ati:
“Birakwiye kumenyesha ko abasirikare benshi b’Abarundi bashyinguwe mu mva ziri i Kasika, nka hitwa shishi na Tabona, mbere yo gukubitwa bikomeye n’intare za Sarambwe.”
Nubwo Willy Ngoma atatangaje umubare w’abahaguye cyangwa bakomeretse, ariko yavuze ko ari igihombo gikomeye ku ngabo z’u Burundi, avuga ko “zahapfiriye kubera inyungu z’umuntu umwe,” agaragaza ko uwo muntu ari Perezida Evariste Ndayishimiye.
Yanakomeje agira ati:
“Ni isoni n’agahinda kubona abasirikare b’Abarundi bakomerekeye Kasika, Kirungutwe na Mwenga centre, birukankanwa kugeza i Walikale, bajyanwa ku ngufu i Kisangani ngo basubizwe iwabo.”
Iyi mirwano yabaye ku wa Gatatu tariki ya 26/11/2025, aho AFC/M23 yigaruriye Kasika, mu gihe FARDC na Wazalendo bari bahasanzwe bivugwa ko bahunze rugikubita basiga Ingabo z’u Burundi zonyine ku rugamba.
Aka gace gafatwa nk’ingenzi mu bice bya Kivu y’Amajyepfo, kakomeje kuba ikibuga cy’imirwano ishyamiranyije AFC/M23 n’uruhande ruri ku bufatanye n’ingabo za Leta ya RDC, zirimo n’iz’u Burundi zoherejwe mu rwego rwo gufasha izi za FARDC.
Iri tsinda rya AFC/M23 rikomeje gutsimbarara ku gukomeza ibikorwa bya gisirikare, impinduka zifatika mu miyoborere y’igihugu, mu gihe ibiganiro byo gushakira u Burasirazuba amahoro bikomeje gusubira inyuma.
