“FARDC Yatwitse Ibirindiro bya Makanaki mu Misozi ya Uvira”
Ingabo za Leta ya Repubulika ya Demokarasi ya Congo (FARDC) zatwitse ibirindiro bya John Kasimbila uzwi nka Makanaki, umwe mu bayobozi b’umutwe wa Wazalendo, mu gikorwa cyabaye ku wa Gatandatu tariki ya 29/11/2025, nk’uko byemezwa n’abaturage batuye mu misozi ihanamye umujyi wa Uvira, aho iyo kambi yari iherereye.
Amakuru dukesha abatuye muri ako gace avuga ko mbere y’uko iyi kambi itwikwa, habanje kumvikana urusaku rw’amasasu, nyuma hakurikiraho inkongi y’umuriro yakongoye ibyo birindiro, bituma abarwanyi ba Makanaki bahungira mu bindi bice byo kuri iyo misozi.
Bivugwa ko iki gitero cyayobowe na Komanda wa FARDC ushinzwe umujyi wa Uvira, nubwo impamvu y’iki gikorwa itaratangazwa ku mugaragaro. Gusa, hari amakuru avuga ko umubano mubi umaze iminsi hagati ya FARDC na Makanaki nyuma y’imirwano yahuje impande zombi mu minsi yashize, nubwo basanzwe bahurira ku rugamba rwo kurwanya umutwe wa AFC/M23.
Makanaki John Kasimbila, wiyita General, amaze igihe ashinjwa guteza umutekano muke mu misozi ya Uvira na Mwenga, aho akekwaho kwica abaturage no gusahura abagenzi ku mihanda yomuri izo teritware.
Kuba FARDC igabye igitero ku i kambi y’uyu mutwe wa Wazalendo bishobora gusiga icyuho mu mikoranire hagati y’izi ngabo za Leta n’imitwe y’abitwaje intwaro zisanzwe zifatanya mu ntambara yo kurwanya AFC/M23.
Ababikurikiranira hafi babona ibi nk’intandaro y’umwuka mubi waba uri kwiyongera mu barwanya AFC/M23, bikaba bishobora gutuma urugamba ruhindura isura muri Kivu y’Amajyepfo.
