AFC/M23 yinjije ubwato bw’intambara mu mirwano muri Kivu y’Amajyepfo, ihindura isura y’urugamba ku Kiyaga cya Tanganyika
Ihuriro ryitwaje intwaro rya AFC/M23 rirwanya ubutegetsi bwa Repubulika ya Demokarasi ya Congo (RDC) ryatangiye gukoresha ubwato bw’intambara mu mirwano rihanganyemo n’Ingabo za Leta (FARDC) zifatanyije n’inyeshyamba za Wazalendo, mu Ntara ya Kivu y’Amajyepfo. Ibi byiyongereye ku bikoresho bya gisirikare byari bisanzwe bigaragara ko iri huriro rifite, bigahindura imiterere n’ingufu z’urugamba muri ako karere.
Tariki ya 21/12/2025, FARDC na Wazalendo bagabye igitero gikomeye ku birindiro bya AFC/M23 mu gace ka Bangwi, kari muri teritwari ya Fizi, mu mugambi wo kugasubiza mu maboko ya Leta. Nubwo icyo gitero cyari gifite ingufu, AFC/M23 yagisubije inyuma, bituma abaturage baho bafatwa n’ubwoba bwinshi.
Abaturage benshi bahisemo guhunga berekeza mu duce babonaga dutekanye, by’umwihariko Baraka na Mboko, mu gihe umutekano wakomezaga kuzamba. Abatangabuhamya bavuga ko urusaku rw’imbunda n’ibisasu biremereye abaturage, bagatakaza icyizere cy’uko bashobora kuguma mu byabo.
Tariki ya 22/12, Ingabo za RDC na Wazalendo zongeye kugaba igitero muri santere ya Makabola, yari imaze ibyumweru hafi bibiri igenzurwa na AFC/M23. Na bwo iki gitero cyaranzwe no gutsindwa, maze ihuriro rya AFC/M23 rigumana uwo mujyi w’ingenzi mu bya gisirikare n’ubucuruzi.
Ni kuri uwo munsi nyir’izina hamenyekanye ko AFC/M23 yatangiye gukoresha ubwato bw’intambara mu Kiyaga cya Tanganyika, aho yarashe ku ngabo za FARDC na Wazalendo zari zagabye igitero zinyuze mu nkengero z’ikiyaga. Ibyo byatumye izo ngabo zisubira inyuma ku buryo bugaragara.
Umwe mu baturage babonye ibyabaye yagize ati:
“Nyuma y’urusaku rw’ibisasu byaturukaga mu kiyaga, twabonye abasirikare ba FARDC basubira inyuma berekeza muri Mboko. Byaciye igikuba mu baturage, benshi bongera guhunga batinya ko imirwano yakwira hose.”
Imirwano yabaye muri uyu mwaka igaragaza ko AFC/M23 ifite ibikoresho bya gisirikare bihanitse, birimo drones z’intambara, indege zigenzurwa kure n’imbunda ziremereye zirasa intera ndende. Ibi bikoresho byagaragaye cyane mu mirwano yabaye mu Ntara ya Kivu y’Amajyaruguru, aho iri huriro ryashoboye gufata umujyi wa Goma, rikambura FARDC ibice by’ingenzi.
Mu Ntara ya Kivu y’Amajyepfo, cyane cyane mu kibaya cya Rusizi, Leta ya RDC yemeje ko ingabo zayo zarashweho n’imbunda ziremereye na drones z’intambara, bikagaragaza ko intambara imaze gufata isura y’ikirere, ubutaka n’amazi.
Icyemezo cya AFC/M23 cyo kwinjiza ubwato bw’intambara mu mirwano kije mu gihe igenzura ibice bitandukanye byegereye Kiyaga cya Tanganyika, ahari inyungu za gisirikare n’iz’ubucuruzi zihuriramo. Iki kiyaga kandi gisangiwe n’ibihugu bitandukanye, birimo RDC n’u Burundi, bifite ingabo ziri maso kubera umutekano w’akarere.
Abasesenguzi mu bya gisirikare bavuga ko gukoresha amazi nk’urubuga rw’intambara bishobora kurushaho gukaza umutekano muke mu karere kose, bikongera igitutu ku muryango mpuzamahanga n’inzego zishinzwe amahoro, kugira ngo hashakishwe ibisubizo birambye byahagarika iyi ntambara ikomeje guhitana abasivili no guhungabanya ubuzima bw’abaturage.
