Ahamaze iminsi habera urugamba hari ibyahindutse hagati ya M23 n’ihuriro ry’Ingabo za RDC.
Habonetse agahenge mu bice byo muri teritware ya Masisi mu Ntara ya Kivu y’Amajyaruguru ahari hamaze iminsi havugwa imirwano hagati y’u mutwe wa M23 n’ihuriro ry’Ingabo zirwana ku ruhande rwa Leta ya Kinshasa, ariko M23 ikaba ikomeje kuja imbere.
Amakuru ava i Masisi yo kuri uyu wa gatanu tariki ya 17/01/2025 avuga ko mu bice byose habonetse ituze bitandukanye n’indi minsi ishize kuko yo humvikanaga ibiturika byinshi impande zose.
Iri tuze ribonetse mu gihe ku wa kane w’ejo hashize hari hiriwe imirwano ikaze yahuzaga M23 n’ingabo za Congo zifashwa n’iz’u Burundi, Wazalendo na FDLR ndetse na Bacanshuro barimo abaturutse i Burayi no muri Aziya.
Kimwecyo, aka gahenge nubwo kabonetse perezida wa sosiyete sivile y’i Masisi yatangaje ko buri ruhande ruri kugashakishamo imbaraga kugira ngo rw’ubure ibitero bundi bushya mu rwego rwo gushakisha kwagura ibice rugenzura.
Yagize ati: “Muri iki gitondo, harasa n’ahabonetse agahenge muri Masisi, ariko M23 abarwanyi bayo bakomeje kwigira imbere bagera muri Kami-Lwanguba, Mashaki, Kironge na Buserekere. Urebye basa n’abagiye kwigarurira igice kinini cya Buabo ari na ko bakomeza berecyeza Kilambo.”
Uyu muyobozi wa sosiyete sivile yakomeje avuga ko Wazalendo bo bari mu bice bya Luashi no mu bice bikikije agace ka Kohongole, ugana muri Kahanga na Kasura, mu gihe hari n’abandi barwanyi ba Wazalendo bari mu gace ka Buabo, ndetse ari na bo bakomeje guhunga M23.
Yanavuze ko Masisi centre n’ibindi bice byaho hafi bikiri mu maboko ya M23.