Amerika na Iran mu Biganiro Bikomeye i Islamabad
Leta Zunze Ubumwe za Amerika n’Igihugu cya Iran byinjiye mu cyiciro gishya cy’ibiganiro by’imbona nkubone i Islamabad, mu rwego rwo gushimangira agahenge (cessez-le-feu) kari kamaze iminsi gashyizweho hagati y’impande zombi.
Aya makuru yemejwe n’ibiro bya Perezida wa Amerika, White House, ndetse n’andi masoko ya dipolomasi, agaragaza ko ibi biganiro bishobora kuba intambwe ikomeye iganisha ku masezerano arambye y’amahoro hagati y’ibihugu byombi bimaze igihe bifitanye umwuka mubi.
Itsinda rya Amerika riyobowe na Visi Perezida JD Vance, afatanyije n’intumwa idasanzwe ya Perezida Donald Trump, ari we Steve Witkoff, ndetse na Jared Kushner, usanzwe ari umujyanama wa hafi wa Perezida. Ibi byemejwe n’umuvugizi wa White House, Karoline Leavitt, mu kiganiro n’abanyamakuru cyabereye i Washington.
Biteganyijwe ko inama ya mbere izatangira mu gitondo cyo ku munsi w’ejo, ku wa Gatandatu tariki ya 11/04/2026, aho impande zombi zizibanda ku gushimangira agahenge kamaze kugerwaho, hagamijwe kukagira umusingi w’amasezerano arambye y’amahoro.
Igihugu cya Pakistan, by’umwihariko umurwa mukuru wacyo Islamabad, gifite uruhare rukomeye mu gutegura no kwakira ibi biganiro. Ubuyobozi bwacyo bwagaragaje ubushake bwo kuba umuhuza hagati y’impande zifitanye amakimbirane, mu rwego rwo kugabanya umwuka mubi mu karere no kongera ijambo ryacyo ku rwego mpuzamahanga.
Raporo zitandukanye zigaragaza ko abayobozi bakuru ba Pakistan bamaze iminsi bagirana ibiganiro bya hafi n’impande zitandukanye zirimo Washington na Tehran, ndetse n’abandi bafatanyabikorwa bo mu karere, hagamijwe gutegura neza uru rubuga rw’ibiganiro.
Nubwo hari intambwe imaze guterwa mu gushyiraho agahenge, umwuka hagati ya Amerika na Iran uracyari mubi, bitewe n’amateka maremare y’amakimbirane arimo ibibazo bya politiki, ubukungu n’umutekano byo mu karere k’Uburasirazuba bwo Hagati.
Icyakora, White House ivuga ko ibi biganiro ari “idirishya rikomeye rya dipolomasi” rishobora gutuma haboneka umuti w’igihe kirekire, nubwo hakiri inzitizi nyinshi zishobora gutuma ayo masezerano atagerwaho vuba.
Kugeza ubu, impande zombi zigaragaza ubushake bwo kuganira, ariko haracyari impungenge ku cyizere gike hagati yazo. Abasesenguzi ba politiki mpuzamahanga bavuga ko niba ibi biganiro bigize icyo bigeraho, bishobora guhindura isura y’umutekano mu karere kose, cyane cyane mu Burasirazuba bwo Hagati.
Pakistan nayo irimo kwigaragaza nk’umuhuza mushya ushobora kugira uruhare rukomeye mu gukemura amakimbirane akomeye ku isi, ibintu bishobora kuyihesha ijambo rikomeye mu ruhando mpuzamahanga.
Muri rusange, ibi biganiro byitezweho byinshi, ariko bizasaba ubushishozi, kwihangana n’ubushake bwa politiki ku mpande zombi kugira ngo bigere ku masezerano arambye.
