Amerika Yateguye Igitero Gikomeye kuri Iran, Umutekano w’Isi Urahungabana Bikomeye
Isi yose iri mu rungabangabo, amaso yayerekeje mu gace ki kigobe cya Perse, aho ingabo za Leta Zunze Ubumwe za Amerika zakusanyije ubwato bw’intambara bwa kijyambere, indege z’intambara zigezweho ndetse n’ibikoresho bihambaye byo gukumira no kurasa ibisasu. Amakuru agenda aturuka hirya no hino yemeza ko Amerika iri hafi gufata icyemezo cyo kugaba igitero gikomeye kuri Iran, igitero gishobora guhindura amateka y’umutekano ku rwego mpuzamahanga.
Amakuru yatangajwe n’urubuga Iran News kuri X (yahoze ari Twitter) avuga ko Amerika yamaze kumenyesha ibihugu by’inshuti n’abafatanyabikorwa bayo ko igitero kuri Iran gishobora kuba mu mpera z’iki cyumweru, kikaba kigamije guhirika ubutegetsi bwa Tehran cyangwa nibura kubushyiraho igitutu gikabije.
Nk’uko ayo makuru abivuga, Washington yizeye ko igitero cy’intambara gishobora:
Kongera igitutu gikomeye ku butegetsi bwa Iran,
Guteza imbere imyigaragambyo y’abaturage isanzwe ivugwa mu bice bitandukanye by’igihugu,
No kugabanya ubushobozi bwa Iran mu bya gisirikare, cyane cyane mu bijyanye n’intwaro z’ubumara n’ikoranabuhanga rya missile.
Televiziyo Channel 13 yo muri Israel yasubiyemo amagambo y’Umugaba Mukuru w’Ingabo z’icyo gihugu wavuze adaciye ku ruhande ati:
“Abanyamerika bazagaba igitero kuri Iran.”
Aya magambo yakomeje gutuma impungenge ziyongera, cyane cyane ko Israel isanzwe ifatwa nk’igihugu kiri ku murongo wa mbere mu bibazo bifitanye isano n’umutekano wa Iran.
Mu rwego rwo kwitegura ibishobora kuba, Ubwongereza bwatangaje ko bwohereje indege z’intambara mu karere Iran iherereyemo, mu rwego rwo gushyigikira no gutabara Israel igihe byaba bibaye ngombwa. Ibi byatumye benshi babona ko ikibazo kigiye kurenga intambara ya Amerika na Iran, kikaba cyahinduka intambara y’akarere cyangwa se ikagira ingaruka ku isi yose.
Iran News ikomeza ivuga ko abayobozi bakuru mu ngabo za Amerika babwiye abafatanyabikorwa babo bo mu Burasirazuba bwo Hagati ko Perezida Donald Trump ashobora gutanga itegeko ryo kugaba igitero mu masaha ya nijoro yo ku Cyumweru, mu gihe cyakwemezwa burundu.
Amakuru akomeza agaragaza ko icyo gitero kitazibanda gusa ku nganda zivugwaho gukora intwaro z’ubumara, ahubwo gishobora no kwibasira abayobozi bakuru ba Iran, ibintu byafatwa nk’intambwe ikomeye cyane mu mateka y’umubano mubi umaze imyaka myinshi hagati y’ibihugu byombi.
Mu gihe umwuka ukomeje kuba mubi, u Burusiya bwatangaje ko ku wa Gatanu Perezida Vladimir Putin yakiriye Ali Larijani, Umunyamabanga Mukuru w’Inama Nkuru y’Umutekano muri Iran, mu biganiro byabereye mu biro bya Perezida Putin i Kremlin, i Moscow. Ibi biganiro byafashwe nko gushaka inzira zo gukumira intambara cyangwa se guhuza imbaraga mu gihe Iran yaterwa.
Ku rundi ruhande, Minisitiri w’Ububanyi n’Amahanga wa Iran, Seyed Abbas Araghchi, yagiriye uruzinduko muri Turukiya, aho yagiranye ibiganiro na Perezida Recep Tayyip Erdoğan, bigamije kurebera hamwe uko umutekano w’akarere wakwifashishwa mu gihe intambara yaduka.
Iran yatangaje ku mugaragaro ko niterwa izitabara byihuse, kandi ikarasa ku nyungu zose za Amerika aho ziri hose, ndetse no kuri Israel. Ibi byatumye impungenge z’uko intambara ishobora gufata indi ntera, ikarenga imbibi za Iran, ziyongera ku rwego rutigeze rubaho mu myaka ya vuba.
Umubano wa Amerika na Iran umaze imyaka irenga 40 urangwa n’umwiryane, watangiye cyane nyuma ya Revolisiyo ya Islam yo mu 1979, yakurikiwe n’ifatwa ry’abadipolomate ba Amerika i Tehran. Kuva icyo gihe, ibihano, intambara z’amagambo, n’ibibazo bijyanye n’intwaro za kirimbuzi byakomeje gushyira ibi bihugu ku murongo wo guhangana.
Uyu munsi, isi yongeye kwisanga mu bihe bikomeye, aho icyemezo kimwe gishobora guhindura amateka, kikagira ingaruka ku bukungu, umutekano n’imibanire y’ibihugu ku rwego mpuzamahanga.
