Iran Yakomeje Gukaza Umurego mu Ntambara Ihanganyemo na Israel na Amerika
Mu gihe umwuka mubi ukomeje gututumba mu Burasirazuba bwo Hagati, Ingabo zidasanzwe za Iran zizwi nka Islamic Revolutionary Guard Corps (IRGC) zatangaje ko zizakomeza guhiga no gukora iyo bwakabaga zikica Minisitiri w’Intebe wa Israel Benjamin Netanyahu, mu gihe intambara ikomeje gufata indi ntera hagati ya Iran, Israel na Leta Zunze Ubumwe za Amerika.
Mu itangazo ryatangajwe n’ibitangazamakuru byo muri Iran, IRGC yavuze ko Netanyahu ari “umunyabyaha wica abana” kandi ko igihe cyose azaba akiriho bazakomeza kumushakisha kugira ngo bamwice. Iri tangazo ryagaragaje ko Iran ishobora gukomeza gukaza ibitero ku nyungu za Israel n’abafatanyabikorwa bayo mu gihe imirwano igikomeje.
IRGC yagize iti: “Niba uyu munyabyaha wica abana akiriho, tuzakomeza kumuhiga Kugeza tumwishe dukoresheje imbaraga zacu zose.” Aya magambo agaragaza ubukana bw’imvugo za politiki n’igisirikare bikomeje kurushaho gukaza umwuka mubi hagati y’ibihugu byombi.
Umubano hagati ya Iran na Israel umaze imyaka myinshi urimo amakimbirane akomeye, cyane cyane kuva mu mwaka wa 1979 nyuma ya Iranian Revolution yahinduye ubutegetsi muri Iran. Kuva icyo gihe, ubuyobozi bwa Iran bwagiye buvuga ko Israel ari umwanzi ukomeye mu karere.
Iran ishinja Israel ibikorwa byinshi by’ubutasi n’ibitero byibasira ibikorwa byayo bya gisirikare n’ibya kirimbuzi, mu gihe Israel nayo ishinja Iran gutera inkunga imitwe irwanya Israel mu karere k’Uburasirazuba bwo Hagati, harimo Hezbollah muri Libani na Hamas muri Gaza.
Aya magambo ya IRGC aje mu gihe amakimbirane hagati ya Israel n’imitwe ishyigikiwe na Iran akomeje kwiyongera, ndetse na Amerika iri mu bafasha Israel mu rwego rwa gisirikare n’ikorwa rya dipolomasi.
Abasesenguzi mpuzamahanga bavuga ko amagambo nk’aya ashobora kurushaho kongera ubushyamirane mu karere, cyane cyane mu gihe hari ubwoba ko intambara ishobora kwaguka ikarenga imbibi z’akarere ka Gaza n’ibindi bice by’Uburasirazuba bwo Hagati.
Nubwo bimeze bityo, Israel ntacyo iratangaza ku mugaragaro ku magambo mashya yatangajwe na IRGC. Ariko mu bihe byashize, ubuyobozi bwa Israel bwagiye buvuga ko buzakomeza kurinda umutekano w’igihugu cyabo no kurwanya uwo ari we wese ubangamira ubusugire bwacyo.
Ibi bikomeje kugaragaza ko umwuka w’intambara hagati ya Iran na Israel ugikomeje gukaza umurego, mu gihe amahanga akomeje guhamagarira impande zombi kwirinda ibikorwa byatuma amakimbirane arushaho gukomera.