Amerika Yikuye mu Miryango Mpuzamahanga 66, Perezida Trump Aharanira Inyungu z’Abanyamerika
Perezida wa Leta Zunze Ubumwe za Amerika, Donald Trump, yasinye iteka rikomeye ryemeza ko iki gihugu cyikuye mu mikoranire n’imiryango mpuzamahanga 66, irimo 31 ikorera mu Muryango w’Abibumbye (Loni) n’indi 35 itari iy’uwo muryango, avuga ko idatanga umusaruro ugaragara ku nyungu z’Abanyamerika.
Iki cyemezo gishingiye ku masezerano ya politiki Perezida Trump yari yarahaye abaturage ba Amerika, aho yagaragaje ko mu buyobozi bwe azashyira imbere inyungu z’igihugu n’iz’abaturage bacyo, aho gushyira imbaraga mu nshingano mpuzamahanga atabonamo inyungu zifatika.
Ubutegetsi bwa Amerika buvuga ko myinshi muri iyo miryango idahuye n’icyerekezo n’indangagaciro z’igihugu, ko iyoborwa nabi, ikanagaragaza imikorere idahuye n’inyungu za Amerika, ndetse ikaba ishobora no gushyira mu kaga ubwigenge n’ubwisanzure by’Abanyamerika.
Iri teka rije rikurikira politiki Perezida Trump asanzwe azwiho yo kugabanya uruhare rwa Amerika mu miryango mpuzamahanga, ashimangira ko igihugu cye kigomba kubanza kwiyubakira ubushobozi n’umutekano byacyo imbere, mbere yo kwitanga mu nshingano mpuzamahanga zidafite inyungu zigaragara.
Iki cyemezo gishobora guteza impaka n’ingaruka ku mubano wa Amerika n’abafatanyabikorwa bayo ku rwego mpuzamahanga, cyane cyane mu Muryango w’Abibumbye, aho Amerika yari isanzwe ifite uruhare runini mu bikorwa no mu ngengo y’imari. Gusa ku ruhande rwa Perezida Trump n’abamushyigikiye, iki ni ikimenyetso gikomeye cy’uko Amerika yongeye kwiyemeza politiki ya “America First,” ishyira imbere inyungu zayo mbere ya byose.
