“Bintou Keita, Intumwa ya LONI muri RDC, Yasezeye ku Mirimo Ahita Ajya mu Kiruhuko cy’Izabukuru”
Ishami ry’Umuryango w’Abibumbye rishinzwe kugarura amahoro muri Repubulika ya Demokarasi ya Congo (MONUSCO) ryatangaje ko Bintou Keita, wari uhagarariye LONI muri RDC, yasezeye ku mirimo ye agahita ajya mu kiruhuko cy’izabukuru, nk’uko byemezwa n’amakuru yizewe aturuka muri LONI.
Bintou Keita, ukomoka muri Guinée, yari amaze imyaka isaga itatu ayobora ibikorwa bya MONUSCO mu gihugu cyugarijwe n’ibibazo by’umutekano, by’umwihariko mu Ntara za Kivu aho ingabo za FARDC n’abambari bazo bakora ibitero ku baturage.
Yamenyekanye cyane mu ruhando mpuzamahanga nk’umuyobozi w’intyoza mu by’umutekano n’amahoro, kandi yaranzwe no gushimangira ko MONUSCO igomba kuva muri RDC mu buryo butekanye, bwubahiriza ubusugire bw’igihugu n’umutekano w’abaturage.
Asezeye mu gihe ibikorwa bya MONUSCO biri mu cyiciro cya nyuma cy’isezera ryayo muri RDC, bikaba bikomeje gukorwa gahoro gahoro hashingiwe ku masezerano hagati ya Leta ya Congo na LONI.
Bivugwa ko gusezera kwa Bintou Keita kuje mu gihe hakomeje kwibazwa ku ruhare rwa MONUSCO mu kugarura amahoro, ndetse n’ahazaza h’umutekano mu Burasirazuba bwa Congo.
Kugeza ubu ntiharatangazwa usimbura Keita ku buyobozi bwa MONUSCO, ariko Umuryango w’Abibumbye watangaje ko uzakomeza gufasha RDC mu nzira y’amahoro n’iterambere rirambye.
Bintou Keita yasize ashimangiye ko amahoro arambye muri Congo ashoboka binyuze mu bufatanye bwa politiki, igisirikare, ubuyobozi bwiza no gukemura ibibazo by’ubutabera n’ubwiyunge bw’abaturage.
