Bwa mbere Tshisekedi avuze icyo agiye gukora, nyuma y’ifatwa rya Goma.
Perezida wa Repubulika ya demokarasi ya Congo, Félix Tshisekedi, yatangaje icyo igihugu cye kigiye gukora nyuma y’aho umutwe wa M23 wigaruriye umujyi wa Goma wo mu Ntara ya Kivu y’Amajyaruguru.
Ku wa mbere w’iki Cyumweru turimo, tariki ya 27/01/2025, ni bwo umutwe wa M23 wafashe umujyi wa Goma, nyuma y’urugamba rukomeye rwahuje uyu mutwe n’ihuriro ry’ingabo za Congo.
Itangazo uyu mutwe wa M23 washyize hanze mu rukerera rwo ku wa mbere, ryemeje ko wafashe uyu mujyi wa Goma, maze risaba aba wuturiye gutekana, ndetse kandi risaba ingabo za FARDC n’abambari bazo kurambika intwaro zabo hasi.
Kuva uyu mujyi wigaruriwe n’uyu mutwe wa M23, perezida Tshisekedi yarataragira icyo abivugaho.
Iri joro ryaraye rikeye rishyira kuri uyu wa kane, ni bwo uyu mukuru w’igihugu yagejeje ku banyagihugu ijambo, maze abizeza ko agiye “kwihorera gukomeye” kubo yise abaterabwoba n’ababafasha.
Yagize ati: “Igihugu cyacu ntabwo kizareka ngo gisebe cyangwa ngo gihonyorwe, tuzarwana, kandi tuzatsinda.”
Perezida Félix Tshisekedi yavuze kandi ko “Abanye-kongo bagomba gukomeza ingabo z’iki gihugu, kandi ko buri wese mu rubyiruko afite umwanya mu ngabo z’iki gihugu. “
Yunzemo kandi ati: “Mwinjire mu ngabo muri benshi, kugira ngo turwanye umwanzi.”
