Byakomeye i Washington DC hoherejwe intumwa kuja gushinja Tshisekedi kuyobora nabi.
Kikaya Bin Karubi, usanzwe ari mu bantu bahora hafi ya Joseph Kabila Kabange, akaba n’umujyamama we, ni we Kabila yohereje muri Leta Zunze ubumwe z’Amerika kubonana n’abategetsi b’icyo gihugu mu rwego rwo kugira ngo abasobanurire politiki mbi perezida Felix Tshisekedi ayoboranye Abanye-Congo.
Mu ntangiriro z’iki cyumweru turimo ni bwo Kikaya yerekeje i Washington DC avuye i Goma mu Burasizuba bwa Repubulika ya demokarasi ya Congo.
Mu kiganiro uyu Kikaya yagiranye n’igitangazamakuru cya Jeunne Afrique, yakibwiye ko “ubutumwa nyamukuru ashyiriye Abanyamerika bukubiye mu ijambo Joseph Kabila yagejeje ku Banye-Congo mbere yuko aja i Goma mu kwezi gushize.”
Icyo gihe yavuze ko agiye gutaha, maze ngwatange umusanzu we mu gufasha Abanye-Congo kugira ngo ubutegetsi bwa Tshisekedi buri kuroha igihugu cyabo mu manga bushyirweho iherezo ryanyuma.
Kikaya, akomeza asobanuye ko agomba gusobanurira imitwe yombi y’abagize inteko ishinga amategeko ya Leta Zunze ubumwe za Amerika, inyungu yo kugaruka muri politiki kwa Kabila, ibyo yakoze kugira ngo arengere umuryango wa Politiki wa PPRD, ubundi kandi ngo anafashe abantu gusobanukirwa ukuri kw’ibibazo igihugu kiri gucyamo kubera ubutegetsi bubi bwa perezida Felix Tshisekedi.
Kikaya watumwe i Washington DC, yahagiye mu gihe kandi harimo kubera ibiganiro by’amahoro hagati y’u Rwanda na Congo. Binateganyijwe ko ibi bihugu byombi bizasinyana amasezerano y’amahoro mu kwezi gutaha kwa karindwi.
Uru ruzinduko rwa Kikaya muri Amerika, arukoze kandi mu gihe mu minsi mike ishize umunyapolitiki utavuga rumwe n’ubutegetsi bw’i Kinshasa, Moïse Katumbi, na we yari aha heruka; bivugwa ko yahuye na minisitiri w’ubanye n’amahanga waho, bakagirana ibiganiro n’ubundi byenda gusa n’ubutumwa Kikaya yazaniye abategetsi b’iki gihugu, kuko na we yashinja ubutegetsi bw’i Kinshasa kuroha igihugu cyabo mu mwijima w’icyuraburindi.
