Captain Ndinzabera: Inkuru y’Ubutwari n’Urugamba rwo Kurengera Abanyamulenge mu misozi y’i Mulenge
Captain Ndinzabera Mayunga ni umwe mu basirikare bagaragaje ubwitange n’ubutwari mu bihe bikomeye by’umutekano muke mu Burasirazuba bwa Repubulika Iharanira Demokarasi ya Congo (RDC), cyane cyane mu bice by’imisozi miremire y’i Mulenge, aho ibikorwa by’intambara bimaze imyaka myinshi bigira ingaruka ku baturage b’Abanyamulenge.
Uyu musirikare abarizwa muri MRDP-Twirwaneho, igamije kwirwanaho mu rwego rwo kurinda abaturage bo mu bwoko bw’Abanyamulenge bahohoterwa n’ingabo za FARDC, ingabo z’u Burundi n’imitwe itandukanye ikorera muri ako karere, irimo FDLR yasize ikoze jenoside yakorewe Abatutsi mu Rwanda mu 1994. MRDP-Twirwaneho yagiye igaragara cyane mu bikorwa byo gukumira ingabo za Leta ya RDC (FARDC) zifatanyije n’indi mitwe irimo Wazalendo, FDLR ndetse n’ingabo z’u Burundi, mu bitero bagaba mu duce dutuwe n’Abanyamulenge, cyane cyane muri teritwari ya Fizi, mu misozi ya Itombwe no mu misozi ya Uvira.
Amakuru aturuka ku basirikare bakoranye na we agaragaza ko Captain Ndinzabera azwiho kudasubira inyuma igihe ari ku rugamba. Bavuga ko ari umusirikare ufite umutima ukomeye, ukunze kujya ku isonga mu mirwano, cyane cyane mu bitero byabereye mu bice by’i Ndondo na Rurambo—aho ibikorwa by’intambara byagiye biba bikomeye mu bihe bitandukanye.
Nubwo ari umunya-Minembwe, ibikorwa bye byinshi byibanze mu duce twa Ndondo na Rurambo, aho bivugwa ko kugeza ubu ari ho agikorera ibikorwa bye bya gisirikare.
Amateka ya Captain Ndinzabera agaragaza urugendo rurerure rwaranzwe n’ubuhunzi n’ingaruka z’intambara. Mu mwaka wa 2008, yahungiye i Nairobi muri Kenya, aho yari yaragiye ashaka ubuhungiro bitewe n’umutekano muke mu gihugu cye.
Nyuma y’imyaka isaga icumi, ku itariki ya 12/07/2019, yafashe icyemezo cyo kugaruka mu Minembwe, aje gutabara abo mu bwoko bwe bw’Abanyamulenge mu gihe bari mu bihe bikomeye by’umutekano muke. Kuva icyo gihe, yahise yinjira mu bikorwa by’intambara, agaragaza ubuhanga n’ubwitange byatumye yigaragaza mu bandi basirikare.
Mu minsi ya vuba aha, ubuyobozi bwa MRDP-Twirwaneho bwahaye amapeti abasirikare babwo bagaragaje ubwitange n’ubushobozi ku rugamba. Muri abo, harimo n’itsinda ry’abasirikare barenga 50 ryazamuwe mu ntera, aho Ndinzabera Mayunga yahawe ipeti rya Captain—ikimenyetso cy’icyizere n’ishimwe ku ruhare rwe mu mirwano.
Captain Ndinzabera ni mwene Pasitori Mayunga, utuye mu gace ka Runundu, muri Minembwe. Uyu muryango uzwiho ubutwari n’uruhare mu kurengera abandi n’imibereho y’abaturage bo muri ako karere.
Inkuru ya Captain Ndinzabera igaragaza ishusho rusange y’ikibazo cy’umutekano muke kimaze imyaka myinshi mu Burasirazuba bwa RDC, aho ibi bibazo byatumye abaturage benshi bahunga, abandi bakicwa cyangwa bagatakaza ibyabo, mu gihe amahoro arambye agikomeje gushakishwa binyuze mu biganiro bya politiki n’ingamba za gisirikare.
Captain Ndinzabera ni uwo utangira, wambaye ingofero y’umutuku Ufite n’icyombo.
