Delly Sesanga Ashimangiye Icyo Benshi Batinyaga Kuvuga: “Nta Biganiro Byatanga Amahoro Hatabayeho Kabila na AFC/M23”
MINEMBWE CAPITAL NEWS (MCN)
Mu gihe Repubulika Iharanira Demokarasi ya Congo (RDC) ikomeje gushakisha inzira y’ibiganiro bigamije gukemura ibibazo by’umutekano muke n’impagarara za politiki, umuyobozi w’ihuriro ry’abatavuga rumwe n’ubutegetsi rya C64, Delly Sesanga, yatangaje ibyo avuga ko ari ingenzi mbere y’uko ibiganiro by’igihugu bitangira.
Sesanga yavuze ko ibiganiro bizagira umumaro ari uko bizaba birimo impande zose zifite uruhare mu bibazo igihugu gihanganye na byo, harimo n’abafite intwaro mu ntambara yo mu Burasirazuba bwa RDC.
Ibi yabigarutseho mu kiganiro cyabereye kuri Space Live, cyakurikiranywe n’abantu barenga ibihumbi 10. Muri icyo kiganiro, uyu munyapolitiki yavuze ko ibiganiro bidakwiye kuba umwanzuro ugarukira ku mashusho cyangwa ku rwego rw’imvugo gusa, ahubwo ko bigomba kuba urubuga rwo gushakira igihugu ibisubizo birambye.
Delly Sesanga yasobanuye ko mbere yo gutangira ibiganiro hakenewe kugabanya impagarara za politiki no gushyiraho uburyo bwizewe butuma buri ruhande rugira icyizere.
Yagize ati:
“Ni ibisanzwe ko ibiganiro bigomba kubera ahantu hatuje, ahubahirizwa amahoro n’ubwisanzure bwa buri wese.”
Yongeyeho ko ibisubizo bizava muri ibyo biganiro bigomba kugira uburyo busobanutse bwo gushyirwa mu bikorwa, kugira ngo bitazongera kuba amasezerano adashyirwa mu bikorwa.
Ati:
“Uburyo bwo gushyira mu bikorwa imyanzuro n’ibisubizo bizagerwaho bugomba kuba bwizewe kugira ngo igihugu gitere imbere.”
Mu byo Sesanga yise ingamba zo kongera icyizere hagati y’impande zitandukanye, yavuze ko hari abantu bafunzwe kubera impamvu za politiki, abandi bakaba barambuwe uburenganzira bumwe na bumwe.
Yagize ati:
“Hari urubyiruko ruri muri gereza, hari Abanyekongo bambuwe pasiporo, hari n’abantu bakatirwa mu buryo budakwiye.”
Kuri we, izo ngamba zagira uruhare mu kugabanya umwuka w’ubwumvikane buke no gufasha impande zose kwegera igisubizo cy’ibibazo igihugu gifite.
Sesanga kandi yavuze ko hari n’imanza zimwe na zimwe ziri mu byo baganiriyeho, atanga urugero rw’umunyamakuru n’umurwanashyaka Benjamin Babunga, avuga ko yamuvuzeho mu biganiro yagiranye na Perezida w’u Burundi, Évariste Ndayishimiye.
Kimwe mu bintu by’ingenzi byagarutsweho na Delly Sesanga ni uko ibiganiro by’igihugu bigomba kuba birimo impande zose zifite uruhare mu kibazo cy’umutekano.
Yamaganye igitekerezo cyo kugirana ibiganiro n’impande za politiki gusa, avuga ko ibyo bishobora kudatanga umuti ku kibazo cy’intambara.
Yagize ati:
“Ni gute mwakemura ikibazo cy’intambara mutaganiriye n’abayirwana?”
Yakomeje avuga ko ibiganiro bidakwiye kuba hagati ya Perezida Félix Tshisekedi n’ihuriro AFC/M23 gusa, ahubwo ko hakwiye kubamo impande zose zifite ibyo zinubira cyangwa uruhare mu bibazo by’igihugu.
Ati:
“AFC/M23, Perezida Tshisekedi, Joseph Kabila ndetse n’abandi bose bafite ibibazo cyangwa ibitekerezo ku hazaza h’igihugu bagomba kugira umwanya wo gushakira hamwe ibisubizo.”
Umuyobozi wa C64 yavuze ko gukura ku ruhande bamwe mu bafite uruhare rukomeye mu bibazo bya RDC bishobora gutuma ibiganiro bitagera ku ntego.
Yagaragaje ko uwahoze ari Perezida Joseph Kabila, umuyobozi wa AFC, Corneille Nangaa, ndetse n’ihuriro AFC/M23 bagomba kugira umwanya muri ibyo biganiro niba intego ari ugushaka amahoro arambye.
Ati:
“Ibiganiro birimo bamwe gusa ntibishobora kuba ibiganiro bizana ibisubizo ku mahoro, umutekano n’ituze ry’igihugu.”
Yongeyeho ko kugira ubutwari bwo kwemera ko buri ruhande rugomba kugira uruhare ari ingenzi mu gushaka igisubizo kirambye.
Aya magambo ya Delly Sesanga aje mu gihe ubutegetsi bwa Kinshasa bumaze igihe butangaza ko bushaka gutegura ibiganiro by’igihugu bigamije gushakira umuti ikibazo cy’umutekano mu Burasirazuba bwa RDC ndetse n’ibibazo bya politiki biri mu gihugu.
Ariko ihuriro C64 ryashyizeho ibyo ribona nk’iby’ingenzi mbere y’uko ibyo biganiro bitangira, birimo kurekura bamwe mu bafunzwe, gukuraho inzitizi za politiki no kwinjiza mu biganiro impande zose zifite uruhare ku kibazo cya Congo.
Ubu ikibazo gikomeye gisigaye ni ukumenya niba ubutegetsi bwa Kinshasa buzemera ubusabe bwo gutegura ibiganiro birimo impande zose, cyangwa niba buzakomeza inzira y’ibiganiro bigizwe n’abantu bake.
MINEMBWE CAPITAL NEWS (MCN)
