Drone za FARDC n’u Burundi Zahitanye Amatungo y’Abanyamulenge mu Gitero gikomeye
Mu gihe umutekano ukomeje kuzamba mu burasirazuba bwa Repubulika Iharanira Demokarasi ya Congo, amakuru aturuka mu misozi miremire ya Minembwe, mu Ntara ya Kivu y’Amajyepfo, aravuga ko habaye igitero gikomeye cyifashishije indege zitagira abapilote (drones), cyahitanye amatungo menshi y’abaturage b’Abanyamulenge.
Aya makuru agaragaza ko ingabo za FARDC, zifatanyije n’ingabo z’u Burundi ndetse n’imitwe yitwaje intwaro irimo Wazalendo, zagabye ibitero bya drone byateye ibisasu mu nka z’abaturage, hapfamo inka zirenga 61, mu gihe izindi zisaga 35 zakomeretse bikomeye.
Amakuru yatanzwe n’umuturage wo muri Minembwe, waganiriye n’itangazamakuru rya Minembwe Capital News, yemeza uburemere bw’iki gitero. Yagize ati: “Mu ijoro ryakeye, barashe inka zirenga 61 zirapfa, izindi zirenga 45 zirakomereka bikabije.”
Ibi bitero byabereye mu gace ka Rundu, kari hafi ya centre ya Minembwe, bikaba byiyongera ku bindi bimaze iminsi bigabwa mu bice bitandukanye birimo Gitavi, Gakenge, Kalongi, Kalingi na Bidegu.
Akarere ka Minembwe kamaze imyaka myinshi karangwa n’umutekano muke uterwa n’ibitero ingabo za leta, zifatanyije n’iz’u Burundi n’imitwe yitwaje intwaro, bagaba mu mihana ituwe n’Abanyamulenge. Abanyamulenge, bagize igice cy’abaturage bahatuye, bakunze kugaragaza ko bibasirwa n’ibitero by’umwihariko, bigahitana abantu n’amatungo yabo.
Amatungo, cyane cyane inka, ni ingenzi cyane ku mibereho y’aba baturage kuko ari yo soko y’imibereho, ubukungu n’umuco wabo. Kubura inka ku rugero rungana gutya bisiga ingaruka zikomeye zirimo inzara, ubukene bukabije no kwimurwa ku gahato.
Ikoreshwa rya drone mu kugaba ibitero nk’ibi rikomeje guteza impaka mu bakurikiranira hafi ibibazo by’umutekano muri aka karere. Abasesenguzi bavuga ko ikoreshwa ry’ubu buryo bugezweho bushobora kurushaho kongera ubukana bw’intambara, cyane cyane iyo bukoreshwa mu bice bituwe n’abaturage, bigashyira ubuzima bwabo mu kaga gakomeye.
Mu gihe ibikorwa by’ubugizi bwa nabi bikomeje kwiyongera mu bice bya Minembwe n’ahandi mu burasirazuba bwa Congo, haracyakenewe ingamba zihamye zo kugarura amahoro arambye, zirimo ibiganiro bya politiki, guhagarika imirwano no kurinda abasivili.
Abaturage bo muri utu duce bakomeje gusaba ubufasha bwihutirwa bw’imiryango mpuzamahanga, kugira ngo bahabwe uburinzi n’ubutabazi mbere y’uko ibibazo byabo birushaho gukomera.