Ebola Iteje Impungenge: U Bwongereza Bwatangaje Amakuru Akomeye Avuye muri RDC!
Minembwe Capital News (MCN)
Umugabo ukomoka mu Bwongereza yanduye icyorezo cya Ebola ubwo yari muri Repubulika Iharanira Demokarasi ya Congo (RDC), ahita asubizwa mu Bwongereza kugira ngo akomeze kwitabwaho n’inzego z’ubuzima.
Nk’uko byatangajwe kuri uyu wa Kane, tariki ya 05/11/2026, uyu mugabo ni we Mwongereza wa mbere wemejweho ubwandu bwa Ebola kuva icyorezo giheruka kwaduka muri RDC. Amakuru yatangajwe n’ibiro ntaramakuru Reuters avuga ko uyu mugabo ari umukozi mu rwego rw’ubuzima.
Nyuma yo kwandura, yahise asubizwa mu Bwongereza, aho yashyizwe muri gahunda yihariye yo kwitabwaho n’inzego z’ubuzima z’icyo gihugu.
Umuvugizi wa Guverinoma y’u Bwongereza yatangaje ko icyo gihugu gifite uburyo bwihariye bwo kwita ku bantu banduye indwara z’ibyorezo nka Ebola, kandi ko ubwo buryo bwamaze gushyirwa mu bikorwa. Yongeyeho ko ibyago byo kuba iyi ndwara yakwirakwira mu baturage b’u Bwongereza bikiri ku rwego rwo hasi.
Ebola imaze guhitana abantu barenga 5.000 muri RDC
Kuva icyorezo cya Ebola cyaduka muri RDC mu kwezi kwa gatanu 2026, hamaze kwemezwa abarwayi barenga 10.000, muri bo abarenga 5.000 bakaba baritabye Imana.
Iki ni cyo cyorezo cya Ebola kimaze guhitana abantu benshi kurusha ibindi byigeze kugaragara muri RDC. Imibare yo mu mpera z’ukwezi kwa cumi 2026 yagaragazaga ko 48,6% by’abamaze kwandura iki cyorezo bitabye Imana.
Ubwoko bwa virusi ya Ebola buri gukwirakwira muri iki gihugu ni Bundibugyo, ibintu byatumye inzego z’ubuzima zikaza ingamba zo gukumira ubwandu.
Ishami ry’Umuryango w’Abibumbye ryita ku Buzima (OMS) ryatangaje ko hari inkingo zibiri nshya ziri gutegurwa kugira ngo zigeragerezwe mu guhangana n’ubu bwoko bwa Ebola, mu gihe inzego z’ubuzima za RDC na zo zabyemeje.
Urukingo rumwe rwakozwe na Kaminuza ya Oxford ku bufatanye na Serum Institute of India, mu gihe urundi rwakozwe n’ikigo Moderna.
Ebola yandura ite?
Ebola ni indwara ikomeye yandura binyuze mu gukora ku matembabuzi yo mu mubiri w’umuntu uyirwaye. Mu bimenyetso byayo harimo kugira umuriro, kuruka no gucibwamo. Ishobora kandi gutera kwangirika kw’ingingo z’umubiri ndetse no kuva amaraso imbere mu mubiri.
Uretse muri RDC, ubwandu bwa Ebola bwagiye bunagaragara no mu bindi bihugu birimo Kenya, Nigeria na Uganda.
Minembwe Capital News (MCN)