FIZI: Umuyobozi w’Ishuri Yacikanye Akayabo k’Amafaranga y’Abarimu
Muri teritwari ya Fizi, mu Ntara ya Kivu y’Amajyepfo, haravugwa ikibazo gikomeye cy’umuyobozi w’ishuri watwaye amafaranga y’abarimu akaja ahantu hatarabasha kumenyekana kugeza ubu Sungura David Kyabi, ari nawe muyobozi w’Ishuri Ribanza rya EP Fizi riherereye mu gace ka Sebele, yacikanye amafaranga angana na 11 700 000 FC, yagombaga guhemba abarimu 12 imishahara y’amezi abiri.
Amakuru yemezwa n’umuryango uharanira uburenganzira bwa rubanda Machozi ya Raïya avuga ko Kyabi yashyizwe ku buyobozi n’itorero rya 8ème CEPAC. Ayo mafaranga ngo yari yayahawe n’ishirahamwe rya Caritas, ku biro byayo biherereye i Uvira ku wa Kane, tariki ya 20/11/2025, ariko ahita aburirwa irengero.
Umuryango Machozi ya Raïya wagize uti:
“Abarimu bamaze amezi abiri badahembwa, abana ntibakijya ku ishuri. Ni ikibazo gikomeye kandi giteye impungenge.”
Ibi bibaye mu gihe mu bice bitandukanye bya RDC hakomeje kugaragara ibibazo by’imicungire mibi y’amafaranga y’abakozi, cyane cyane mu rwego rw’uburezi, bikagira ingaruka ku musaruro no ku burenganzira bw’abana bwo kubona uburezi bufite ireme.
Sosiyete sivili yo muri Fizi irasaba ko Minisiteri y’Uburezi n’inzego bireba zinjira mu kibazo mu maguru mashya kugira ngo hakumirwe ihagarara ry’amasomo, ndetse ukekwaho uburiganya akurikiranwe n’ubutabera.
Inzego z’umutekano zasabwe gukorera hamwe n’abaturage mu bikorwa byo gushakisha uyu muyobozi no kumushyikiriza ubutabera, kugira ngo amafaranga y’abarimu abashe kugaruzwa kandi ibikorwa by’ishuri bisubire mu murongo.
Abaturage bo mu gace ka Sebele bavuga ko igikorwa cya Kyabi cyateye umubabaro n’umujinya, ndetse ko ari icyaha kidakwiye kwihanginirwa kuko cyahungabanije uburenganzira bw’abarimu n’ubw’abanyeshuri.
Mu gihe hakomeje ibikorwa byo kumushakisha, abarimu n’ababyeyi bakomeje gusaba inzego za Leta kongera ubugenzuzi ku micungire y’amafaranga ahabwa amashuri ku rwego rwa teritwari, kugira ngo hakumirwe ibyaha nk’ibi byakomeje kugaragara mu bice bitandukanye by’igihugu.
