FRN Yamaganye Ibitero bya Drone Byagabwe mu Bice bya Kalehe, Itangaza ko Abasivili Bishwe n’Abandi Bagakomereka
Minembwe Capital News (MCN)
Umuvugizi w’ihuriro rya politiki n’igisirikare rya Front pour la Refondation de la Nation (FRN), Lawrence Kanyuka, yatangaje ko ingabo zishyigikiye ubutegetsi bw’i Kinshasa zagabye ibitero zikoresheje indege zitagira abapilote (drones) zo mu bwoko bwa kamikaze, zigamije kwangiza ibice bitandukanye iri huriro rivuga ko rigenzura muri Teritwari ya Kalehe, mu Ntara ya Kivu y’Amajyepfo.
Mu butumwa yashyize ahagaragara, Kanyuka yavuze ko ibyo bitero byagabwe ahagana saa cyenda z’amanywa (15h00) ku cyumweru tariki ya 15/11/2026, bikibasira agace ka Bulambika na Kambali, ndetse n’uduce tuhakikije, muri Teritwari ya Kalehe.
Nk’uko Lawrence Kanyuka yabitangaje, ibyo bitero byagabwe n’ihuriro ry’ingabo zishyigikiye ubutegetsi bw’i Kinshasa, ryakoresheje drones zo mu bwoko bwa kamikaze mu bikorwa byo kurasa no gutera ibisasu.
Yavuze ko imibare y’agateganyo y’abahitanywe n’ibyo bitero igaragaza abagabo babiri (2) bishwe, mu gihe abandi baturage benshi bakomeretse. Yongeyeho ko amazu menshi yasenyutse, harimo n’ayo abaturage barimo igihe yibasirwaga.
FRN yamaganye ibyo bitero, ivuga ko byibasiye abaturage b’inzirakarengane. Iri huriro ryasabye Abanye-Congo, imiryango iharanira uburenganzira bwa muntu ndetse n’umuryango mpuzamahanga gukurikirana uburemere bw’ibyo bikorwa n’ingaruka bigira ku baturage b’abasivili.
Iri huriro ryashimangiye ko ubwicanyi n’ibitero byibasira abaturage b’inzirakarengane bidakwiye gufatwa nk’ibintu bisanzwe cyangwa ngo byihanganirwe, ahubwo ko ababigizemo uruhare bakwiye kubibazwa.
Ku ruhande rwa FRN, ubutumwa bwa Kanyuka bujyanye n’umurongo mugari w’impamvu iri huriro rivuga ko ryatangije urugamba. FRN ivuga ko igamije kugarura icyubahiro, agaciro n’ubusugire bwa Repubulika Iharanira Demokarasi ya Congo, ishinja ubutegetsi bwa Perezida Félix Tshisekedi kuba bwarasuzuguje igihugu bukacyambura agaciro, mu gihe abayobozi bashinjwa gushyira imbere inyungu zabo bwite aho gukorera abaturage.
FRN inavuga ko imwe mu ntego zayo z’ingenzi ari ugushyira iherezo ryanyuma ubutegetsi bw’i Kinshasa buriho ubu, buyobowe na Perezida Félix Tshisekedi, no guharanira impinduka mu miyoborere y’igihugu.
Iri huriro rivuga ko urugamba ryatangije rutagamije gusa guhangana n’ingabo za Leta, ahubwo ko rugamije no gusubiza igihugu icyubahiro, kugarura amahoro arambye no gushyiraho imiyoborere mishya ishyira imbere inyungu n’imibereho myiza y’Abanye-Congo.
Kugeza ubu, imibare y’abahitanywe n’ibitero byagabwe muri Bulambika na Kambali yatangajwe na FRN iracyari iy’agateganyo, nk’uko byatangajwe n’umuvugizi waryo, Lawrence Kanyuka.
MINEMBWE CAPITAL NEWS (MCN)
