Gen.Muhoozi yatanze ubutumwa nyuma y’aho M23 yigaruriye umujyi wa Goma.
Umugaba mukuru w’ingabo za Uganda, akaba n’umuhungu wa perezida Yoweli Kaguta Museveni, General Kainarugaba Muhoozi, yashimiye umutwe wa M23 nyuma y’uko ufashe umujyi wa Goma uherereye mu Burasirazuba bwa Repubulika ya demokarasi ya Congo.
Ni ubutumwa uyu mugaba mukuru w’ingabo za Uganda yatanze akoresheje urubuga rwa x, aho yagize ati: “Nyuma yo gufata Goma, dushimiye uyu mutwe wa M23 wayifashe. Muri intwari.”
Yunzemo kandi ati: “Muri abavandimwe; ibi ni nabyo twari twiteze igihe kirekire. Rero, mwabikoze neza. Igihe ni niki ngo Afrika tugenzure impika.”
General Muhoozi, avuga ko n’ubundi Abazungu bari baraciye imipaka nabi, bityo ko hagomba kurebwa igikwiye. Yavuze kandi ko abaheruka gutwika ambasade ya Uganda i Kinshasa bazakurikiranwa aho bari hose bahanwe hisunzwe amategeko.
Ibyo abivuze mu gihe ku wa kabiri i Kinshasa muri RDC, habaye imyigaragambyo yari yahamagajwe na Leta y’iki gihugu, mu rwego rwo kugira ngo bamagane ifatwa rya Goma. Ku Cyumweru tariki ya 26/01/2025, ni bwo uyu mutwe winjiye mu mujyi wa Goma, ubundi ku wa mbere barawigarurira wose, nyuma y’urugamba rukomeye rwari ruyihanganishije n’ingabo za RDC.
Muri iyo myigaragambyo basenye inyubako za ambasade ya Uganda, iya Kenya, iy’u Rwanda n’iya Leta Zunze Ubumwe z’Amerika. RDC ishinja ibyo bihugu kuba inyuma y’umutwe wa M23.
