Habaye Gukozanyaho Hagati ya AFC/M23 n’Ingabo za Leta mu Kibaya cya Ruzizi
Kuri uyu wa Kane, tariki ya 29/01/2026, habaye imirwano y’akanya gato hagati y’ihuriro Alliance Fleuve Congo (AFC/M23) n’ingabo za Repubulika Iharanira Demokarasi ya Kongo (FARDC), zifashijwe n’ingabo za Leta y’u Burundi, abarwanyi ba Wazalendo ndetse na FDLR, mu Kibaya cya Ruzizi, mu Burasirazuba bwa Repubulika Iharanira Demokarasi ya Kongo (RDC).
Iyi mirwano yabereye cyane cyane mu bice bya Kanga, Rugeje na Itisha, biherereye muri Gurupoma ya Kigoma, muri teritwari ya Uvira, mu ntara ya Kivu y’Amajyepfo.
Nk’uko amakuru atandukanye abivuga, iyi mirwano yatangiye ubwo FARDC n’abambari bayo batangiraga kurasa ibisasu mu birindiro by’abarwanyi ba AFC/M23.
Amakuru aturuka ku nzego z’umutekano agaragaza ko kuri uyu munsi imirwano yibasiye by’umwihariko imirongo ya mbere y’ibirindiro, aho impande zombi zagerageje guhangana, buri ruhande rushaka kugumana ibice rwari rufite no kugaba ibitero biri mu murongo w’ibikorwa bya gisirikare.
Ibi bikorwa by’intambara bibaye mu gihe inzego mpuzamahanga, zirimo Umuryango w’Abibumbye (Loni) n’ibihugu bitandukanye, zikomeje kugaragaza impungenge zishingiye ku mutekano muke muri aka karere, zinatangaza ko izi ntambara zishobora kongera guhungabanya amahoro make yari amaze kugerwaho binyuze muri gahunda zitandukanye z’amahoro ziherutse kuganirwaho.
Abaturage bo muri utu duce bakomeje kugaragaza ubwoba n’agahinda bitewe n’urusaku rukabije rw’imbunda n’ibindi bikoresho bya gisirikare, bavuga ko iyi mirwano igira ingaruka zikomeye ku mibereho yabo ya buri munsi. Bamwe bagaragaza ko umutekano muke utuma ibikorwa by’ubuhinzi, ubucuruzi n’uburezi bihungabana cyane.
Ibi byose bigaragara nk’igice cy’uruhererekane rw’umutekano muke umaze igihe muri Repubulika Iharanira Demokarasi ya Kongo, by’umwihariko mu ntara ya Kivu y’Amajyepfo, aho imirwano ikomeje kwiyongera hagati y’impande zihanganye.
AFC/M23 isanzwe yarafashe ibice bitandukanye byo muri Kivu y’Amajyepfo, ndetse yanigeze kwigarurira umujyi wa Uvira, uherereye hafi y’umupaka w’u Burundi, ibintu byateje ihunga rikomeye ry’abaturage benshi.
Iyi mirwano ikomeje guteza ibibazo bikomeye ku mutekano w’abaturage no ku mibereho isanzwe.
Nubwo hashyizweho gahunda zitandukanye z’amahoro guhera mu mwaka wa 2025, ibikorwa by’ingabo za Leta n’imitwe itavuga rumwe na yo bikomeje kugaragaza ko urugendo ruganisha ku mahoro arambye rukiri rurerure.
