I Kinshasa, imfungwa nyinshi zamishijweho urufaya rw’amasasu.
Ni kuri uyu wa Mbere tariki ya 02/09/2024, imfungwa zibarirwa mu mirongo zarashweho urufaya rw’amasasu, zimwe murizo zirakomereka, ubwo zageragezaga gutoroka gereza iri i Kinshasa.
Iyi gereza imfungwa zarasiwemo ni ya Makala iherereye i Kinshasa ku murwa mukuru w’igihugu cya Repubulika ya demokarasi ya Congo, ikaba ifungiwemo imfungwa zikabakaba 15.000 zirimo abasirikare barenga 4,000 ni zo ziyifungiyemo n’ubwo yo ubwayo ifite ubushobozi bwo kwakira imfungwa 1,500 gusa.
Ahagana isaha ya saa munani z’urukerera rwo kuri uyu wa mbere, ni bwo kuri iyi gereza humvikanye urusaku rw’imbunda nyinshi.
Minisitiri w’itumanaho muri Repubulika ya demokarasi ya Congo, Patrick Muyaya, yatangaje akoresheje urubuga rwa x avuga ko irasana ryabereye kuri iyi gereza ryatewe n’uko hari imfungwa zageragezaga gutoroka.
Avuga kandi ko inzengo zishinzwe umutekano zahise zoherezwa kuri iriya gereza mu rwego rwo kugarura amahoro.
Igitangaza makuru cya Jeunne Afrique cyatangaje aya makuru kivuga ko cyabwiwe n’umwe mu bacunga gereza ko imfungwa zarashwe n’abasirikare mu gihe zashakaga gucika.
Andi makuru yatanzwe rugikubita, avuga ko imfungwa zigera kuri 200 kwarizo zarashweho zirakomereka.
Amashusho yagiye hanze akomeje kunyuzwa ku mbuga nkoranya mbaga, agaragaza imfungwa zarashwe, ndetse harimo n’imirambo yazo.
Amakuru kandi avuga ko imfungwa nyinshi zigitsina gore zari zifungiye muri iyi gereza zafashwe ku ngufu, ndetse zimwe mu nyubako zayo ziratwikwa.
Ibi byabaye mu gihe perezida Félix Tshisekedi ari mu ruzinduko mu Bushinwa, mu gihe minisitiri w’intebe, Tuluku Suminwa n’abandi ba minisitiri benshi na bo bari mu ruzinduko.
MCN.