I Lulenge: Imirwano Yongeye Gukara, Ibibera Ku Rugamba Bikomeje Gukurura Amaso!
MINEMBWE CAPITAL NEWS (MCN)
Amakuru agera kuri Minembwe Capital News (MCN) aturutse ku masoko yayo yo mu gace ko Ku wa Mabuye, aravuga ko imirwano ikomeye yongeye kubura hagati y’ingabo za Front pour la Refondation de la Nation (FRN) n’ihuriro ry’ingabo zirwanirira Leta ya Repubulika Iharanira Demokarasi ya Congo (RDC), rigizwe n’ingabo za FARDC, izu Burundi, imitwe ya Wazalendo na FDLR, ndetse n’abacanshuro bakomoka mu bihugu by’i Burayi no muri Aziya.
Amakuru MCN yakuye ku masoko yayo agaragaza ko iyi mirwano yakajije umurego nyuma y’uko ingabo zishyigikiye Leta ya RDC zikoresheje indege zitagira abapilote zizwi nka drones. Ibi byatumye imirwano yimukira mu gace ko Ku wa Mabuye, ivuye mu cyerekezo cyo kwa Maguru, mu Kabanju.
Kugeza ubu, muri ako gace haravugwa imirwano ikomeye hagati y’impande zombi. Amakuru MCN ifite avuga ko ingabo zishyigikiye Leta ya RDC zikomeje gukoresha cyane drones mu bikorwa bya gisirikare biri kubera muri ako karere.
Ayo makuru kandi avuga ko ahagana saa sita z’amanywa, impande zombi zahanganiye mu mirwano mu gace ko kwa Maguru, ariko nyuma imirwano ikaza kwimukira Ku wa Mabuye, cyane cyane mu bice byegereye Kabanju.
Agace ka Kabanju gafite akamaro gakomeye mu bikorwa bya gisirikare, kuko karimo ibirindiro bikomeye by’ingabo za Leta ya RDC, zifatanyije n’ingabo z’u Burundi, imitwe ya Wazalendo na FDLR, ndetse n’abacanshuro bakomoka mu bihugu by’i Burayi no muri Aziya.
Ku rundi ruhande, amakuru MCN yakuye ku masoko yayo avuga ko abarwanyi benshi ba Wazalendo bazamutse baturutse mu cyerekezo cya Milimba. Ibyo na byo byagize uruhare mu gukaza imirwano, mu gihe impande zihanganye zikomeje guhangana muri ako karere.
Nubwo imirwano ikomeje gukaza umurego, amakuru MCN ifite agaragaza ko ingabo za FRN zigikomeje kugumana ibirindiro byazo. Byongeye kandi, mu gace ka Rugezi, ibice FRN yigaruriye ku munsi wabanje biracyagenzurwa na yo, nk’uko ayo makuru abivuga.
Iyi nkuru ishingiye ku makuru Minembwe Capital News (MCN) yakusanyije binyuze ku masoko yayo ari mu gace k’imirwano.
Minembwe Capital News (MCN)