Ibindi byavuzwe ku bwicanyi bwakozwe n’ingabo zirinda Tshisekedi i Goma.
Ni amakuru yashyizwe hanze binyuze mu cyegeranyo umuryango wa Amnesty international uheruka gusohora. Uyu muryango ugaragaza ko abasirikare bo mu mutwe urinda perezida Félix Tshisekedi bishe abasivile benshi mu mujyi wa Goma.
Ubwo bwicanyi bwakozwe tariki ya 30/08/2023 ubwo abasirikare bayobowe na Col Mike Makombe biraraga mu baturage barimo bigaragambya bamagana ingabo za MONUSCO, bakabarasamo urufaya rw’amasasu.
Icyo gihe Leta yatangaje ko hapfuye abantu 56, naho abakomeretse ivuga ko babarirwa muri 70.
Ubu bwicanyi byarangiye Col Mike Makombe na bagenzi be bakatiwe urwo gupfa nyuma yo guhamwa buriya bwicanyi.
Mu bushakashatsi umuryango wa Amnesty international wakoze bwerekana ko umubare w’abishwe ugera ku bantu 102.
Uyu muryango wanaboneye gutangaza ko buriya bwicanyi ntaho buhuriye n’ibivugwa na Leta y’i Kinshasa ivuga ko yakumiraga kuba M23 zakwinjira mu mujyi wa Goma.
Amnesty international yanasabye ubushinjacyaha bw’urukiko mpuzamahanga mpanabyaha (ICC) gukora iperereza kuri ubu bwicanyi; ibyo yanasabye leta ya perezida Félix Tshisekedi.
Uyu muryango kandi wasabye perezida Félix Tshisekedi guhagarika Lieutenant General Constant Ndima Kongba wari guverineri w’intara ya Kivu Yaruguru ubwo buriya bwicanyi bwakorwaga, cyo kimwe na Major Peter Kabwe Ngandu uri mu bakuriye abasirikare babukoze.
