Ibirimo kuvugwa nyuma y’aho visi perezida wa Sudan y’Epfo atawe muri yombi.
Visi perezida wa Sudan y’Epfo, Machar Riek, yatawe muri yombi, ibyatumye ubwoba muri iki gihugu bwiyongera, aho bivugwa ko intambara yahita y’ubura, ndetse za ambasade z’ibihugu bimwe zihita zisaba abaturage bazo kuva ku butaka bw’iki gihugu inzira zikigendwa.
Amakuru ava muri iki gihugu avuga ko gufunga Machar Riek, ni itegeko ryatanzwe na perezida wa Sudan y’Epfo, Salva Kiir mu ijoro ryaraye rikeye rishyira kuri uyu wa kane.
Ni amakuru avuga kandi ko abatavuga rumwe n’ubutegetsi bw’iki gihugu cya Sudan y’Epfo, bavuga ko ibyakozwe na perezida Salva Kiir byo guta muri yombi visi perezida we, bihabanye n’amasezerano y’amahoro yo muri 2018.
Aya makuru akomeza avuga ko naza ambasade za bimwe mu bihugu ziri muri iki gihugu zasabye abaturage bazo bakirimo kukivamo kuko hari impungenge ko ibintu bishobora kuba bibi.
Perezida Salva Kiir, mu ijoro ryaraye rikeye, nibwo yatanze itegeko ryo guta muri yombi visi perezida we, nk’uku iyi nkuru yashyizwe hanze n’ishyaka rya Machar.
Ubundi kandi abashinzwe kurinda umutekano wa visi perezida Machar na bo bambuwe imbunda bajanwa ahantu hatazwi.
Imodaka za gisirikare z’ibifaru zigera muri 20 zinjiye mu rugo rwa Machar ruri i Juba mu murwa mukuru w’iki gihugu cya Sudan y’Epfo, zihita zimuta muri yombi.
Ikindi cyavuzwe nuko ibiro by’ambasade zimwe zikorera muri iki gihugu zahise zifunga imiryango yazo, ubundi kandi zibuza abakozi bazo kujya ku kazi, zinasaba n’abaturage bazo guhita bava muri iki gihugu.
Ni mu gihe kandi n’intumwa yihariye ihagarariye umunyamabanga mukuru w’umuryango w’Abibumbye muri Sudan y’Epfo, yanenze iki gikorwa cyo guta muri yombi visi perezida.
Yagize ati: “Iri joro abayobozi b’iki gihugu bongeye gusubira mu makimbirane mu gihe harimo haterwa intambwe yo kuzana amahoro na demokarasi.”
