Ibitero by’Ingabo z’u Burundi n’iza Leta ya RDC mu misozi ya Minembwe byongeye gukaza umutekano muke
Amakuru aturuka mu misozi miremire y’i Mulenge, muri teritwari ya Minembwe mu Ntara ya Kivu y’Amajyepfo muri Repubulika Iharanira Demokarasi ya Congo, aravuga ko habaye ibindi bitero byagabwe ku baturage b’Abanyamulenge, bigizwemo uruhare n’ingabo z’u Burundi zifatanyije n’iza Leta ya RDC.
Ibi bitero byagabwe ku mihana ituwe n’Abanyamulenge iherereye mu bice bya Gakenge ndetse no mu nkengero za Kalingi, ahazwi nka Bicumbi na Mutunda. Amakuru yizewe atangwa n’abari muri utu duce agaragaza ko izi ngabo zifatanyije n’imitwe yitwaje intwaro irimo FDLR na Wazalendo, ndetse n’abacanshuro bivugwa ko baturutse mu bihugu by’i Burayi na Amerika, bagabye ibyo bitero mu masaha y’itondo cyo kuri uyu wa Kane, tariki ya 19/02/2026.
Nk’uko amakuru akomeza abivuga, iri huriro ry’ingabo zirwana ku ruhande rwa Leta ya RDC, rigizwe n’Ingabo za Leta (FARDC), iz’u Burundi, FDLR na Wazalendo, ryakoresheje intwaro ziremereye n’izoroheje mu kugaba ibyo bitero byibasiraga abaturage.
Umutwe wa MRDP-Twirwaneho uvuga ko urwanira kurengera Abanyamulenge, watabaye usubiza inyuma ibyo bitero. Nubwo bimeze bityo ariko, amakuru aturuka muri ibyo bice avuga ko hari umusivili umwe w’Umunyamulenge wishwe, aho bivugwa ko yararagiye inka ze mu rwuri agahurira n’izo ngabo, akahasiga ubuzima.
Ibi bitero bibaye mu gihe ubuyobozi bwa RDC bwari bwatangaje ko bwemeye agahenge kasabwe na Perezida wa Angola, João Lourenço, mu rwego rwo kugabanya imirwano ikomeje gufata indi ntera mu burasirazuba bw’iki gihugu.
Amateka y’umutekano muke mu misozi ya Minembwe n’ahandi hatuwe n’Abanyamulenge akomeje kuba ingorabahizi, aho abaturage bakomeje kugaragaza impungenge z’umutekano wabo, mu gihe ibikorwa bya gisirikare bikomeje gutuma bamwe bava mu byabo bagahungira mu bindi bice byizewe kurushaho. Ibi bikaba byiyongera ku bibazo by’umutekano bimaze imyaka myinshi birangwa n’imirwano ihanganishije ingabo za Leta n’umutwe wa AFC/M23/MRDP-Twirwaneho ukorera muri Kivu y’Amajyepfo n’iya Majyaruguru.
