Ibyo wa menya ku rugamba rukomeye rwabereye i Ngungu muri Masisi.
Kuri uyu wa gatatu, itariki ya 15/01/2025, muri centre ya Ngungu ho muri teritware ya Masisi mu ntara ya Kivu Yaruguru, habyukiye intambara ikomeye hagati y’umutwe wa M23 n’ihuriro ry’ingabo za Repubulika ya demokarasi ya Congo, maze uriya mutwe wigaranzura ririya huriro, nk’uko amakuru ava muri ibyo bice abivuga.
Iyi mirwano, amasoko yacu avuga ko yari komeye kandi ko byarangiye ihuriro ry’abarwana ku ruhande rwa Leta bahunze muri kariya gace, ubundi M23 irakigarurira kose.
Kuva mu Cyumweru gishize aka gace kagiye kaberamo imirwano, ndetse kumenya uruhande rukagenzura byari ihurizo rikomeye.
Ariko nk’uko amasoko yacu atandukanye dukesha iyi nkuru abivuga, buri ruhande rwari rufite agace ruyoboye, kuko Ngungu ni Localité, kandi ikaba ari agace kagutse.
Gusa mu ntambara zabaye mu mwaka ushize, umutwe wa M23 wari warakigaruriye, ukaba wari ukamazemo amezi arenga icyenda.
Nyamara mu mirwano yabaye uyu munsi, umutwe wa M23 wakabohoje kose.
Umuvugizi w’ungirije wa M23, Oscar Barinda, yari aheruka no gutangaza ko bikuye muri ako gace kumpamvu zokwanga kurwanira mu baturage, ari nabwo FARDC n’abambari bayo bahise batangaza ko bafashe Ngungu.
Icyo gihe Leta ya Kinshasa ni bwo yahise itanga agashimwe kuri buri musirikare winjiye muri ako gace, kandi buri wese ahabwa idorali makumyabiri z’Amerika.
Minembwe.com yanahawe n’ubuhamya bw’umusirikare wa Leta aho yagize ati: “Leta yari yaduhaye agashimwe, kuko twinjiye muri Ngungu. Buri musirikare yariko ahabwa 20$, none M23 yongeye kutwirukana.”
Ubu buhamya bukomeza bugira buti: “Ngungu twayivuyemo nabi. M23 yahafashe hose.”
Iyi nkuru inavuga kandi ko urugamba rwabereye i Ngungu rwaguyemo abasirikare 215 bo ku ruhande rwa Leta, kandi ko 70% by’abapfuye ari abasirikare b’u Burundi, ndetse kandi muri aba bapfuye barimo n’abofisiye bakuru, nk’uko byakomeje bivugwa na Oscar Barinda.
Ariko kugeza ubu ntacyo uruhande rwa Leta ruratangaza kuri iyi nkuru.
Urubuga ruri muzikunda gutangaza intambara ibera muri Masisi, rwagize ruti: “Abana b’u Burundi baguye ku rugamba ari benshi i Ngungu muri teritware ya Masisi.”
Urwo rubuga rwanavuze ko iyo operasiyo Leta yari yayihaye izina rya “Caterpillar,” aho yari ifite intego yo kwirukana umutwe wa M23 muri ako gace.
Gusa birangiye ingabo za, FARDC, FDLR, Wazalendo, ingabo z’u Burundi n’abacanchuro ari bo birukanywe muri kariya gace.
Kurundi ruhande, amakuru avuga ko mu mirwano yabereye muri teritware ya Nyiragongo M23 yafashe akandi gace kitwa Nditi.
