Ifatwa ry’umujyi wa Goma ryatumye i Kinshasa ibintu birushaho gukara.
I Kinshasa ku murwa mukuru w’i Gihugu cya Repubulika ya demokarasi ya Congo, abaturage baho bakoze imyigaragambyo yo kwamagana imirwano ikomeye iri kubera mu Burasirazuba bw’iki gihugu, babomagura zimwe muri za ambasade z’ibindi bihugu ziri aho i Kinshasa.
Ku munsi w’ejo hashize tariki ya 28/01/2025, ni bwo iyi myigaragambyo yabaye i Kinshasa. Muri za ambasade zabomaguwe harimo iy’u Rwanda, iya Uganda, iya Kenya , iya Afrika y’Epfo n’iya Leta Zunze Ubumwe z’Amerika.
Muri iyo myigaragambyo hagaragayemo n’ibikorwa byo gusahura n’ubugizi bwa nabi. Ni bikorwa byagiye binagaragaramo abasirikare b’iki gihugu.
Kandi amakuru avuga ko iyi myigaragambyo yahamagajwe na Leta y’iki gihugu, mu rwego rwo kwamagana ifatwa ry’u mujyi wa Goma.
Abaturage bari muri iyo myigaragambyo bumvikanye barimo bavuga ko ibi bihugu bifite za ambasade zabomaguwe kwaribyo bifite uruhare mu ifatwa ry’umujyi wa Goma.
Polisi y’iki gihugu yabatesheje ikoresheje kubamishaho ibyuka biryana mu maso, bamwe barahunga.
Ku rundi ruhande, inteko y’umuryango w’Abibumbye ishinzwe umutekano ku Isi irongera iterane igitaraganya ku kibazo cy’intambara iri kubera mu Burasirazuba bwa RDC. Yari yateranye bwa mbere ku wa gatanu w’icyumweru gishize ndetse no ku Cyumweru.
Iyi ntambara ibera i Goma no mu nkengero zayo imaze kugwamo abasirikare ba Afrika y’Epfo 13. Icyenda bishwe ku wa Gatandatu w’icyumweru gishize abandi bane bapfuye kuri uyu wa mbere. Abanyafrika y’Epfo bari mu Burasirazuba bwa RDC mu rwego rw’ingabo z’amahoro za SADC.
Abandi basirikare bamaze kwicirwa mu ntambara i Goma ni batatu ba Malawi nabo bari muri SADC, n’undi wishwe umwe n’abandi bane bakomeretse bose ba Uruguay bari muri MONUSCO.
Ahandi habereye imyigaragambyo yamagana ifatwa ry’umujyi wa Goma ni i Bukavu muri Kivu y’Amajy’epfo ni Butembo muri Kivu Yaruguru.
