Ifungurwa ry’Inzira igana Uvira Ritanga Icyizere Gishya ku Baturage bari bamaze igihe mu bwigunge
Mu misozi miremire y’i Mulenge, mu gace ka Minembwe ho mu burasirazuba bwa Repubulika ya Demokarasi ya Congo (RDC), haravugwa impinduka zatangiye gutuma abaturage bongera guhumeka umwuka w’icyizere cyo kubaho. Ifungurwa ry’inzira ihuza Minembwe n’indongo zigana mu mujyi wa Uvira ryakiriwe neza n’abaturage, nyuma y’igihe kirekire bari barafungiwe mu bwigunge bukomeye.
Mu butumwa bwatambutse kuri Minembwe Capital News, umuturage witwa Innocent Nkundamahoro yagaragaje ko abaturage ba Minembwe bishimiye kongera kubona inzira ibahuza n’amasoko aturukamo ibikoresho by’ibanze nkenerwa mu buzima bwa buri munsi. Yibukije ko bari bamaze igihe kitari gito badafite uko bagera ku masoko, ibintu byari byaragize ingaruka zikomeye ku mibereho yabo n’ubukungu bw’akarere.
Ati: “Twari tumaze igihe kirekire dufungiwe inzira zigana mu masoko y’ibintu by’ibanze. Uyu munsi, kuba hari inzira ifunguye biduha icyizere gishya cyo kubaho.”
Gusa n’ubwo hari icyizere, haracyari impungenge zishingiye ku mutekano. Abaturage bo mu misozi y’i Mulenge baribaza uko ejo hazaza h’iyi nzira hazaba hameze, cyane cyane mu gihe havugwa impinduka z’imiterere y’umutekano mu gace ka Uvira. Innocent Nkundamahoro yagaragaje ibyo bibazo agira ati: “Ese niba AFC/M23 yavuye i Uvira, inzira izakomeza ifunguye? Abagenzi bazakomeza kugenda mu mutekano?”
N’ubwo izo mpungenge zikiriho, abaturage batangiye kwitegura gusubukura ingendo bajya i Uvira n’ahandi hatandukanye, mu gihe byaba byemejwe ko umutekano urambye uhari. Ibi byitezweho kongera ubuhahirane, kworohereza kubona ibiribwa n’imiti, ndetse no kuzahura ubuzima rusange bw’abaturage.
Mu gusoza ubutumwa bwe, Innocent Nkundamahoro yibukije ihame mpuzamahanga ry’uburenganzira bwa muntu, ashimangira ko abasivili bose bafite uburenganzira bwo kubaho no kubahwa, hatitawe ku bwoko, isura, inkomoko cyangwa idini. Yashimangiye ko kubahiriza ubwo burenganzira ari inshingano ya buri wese ufite ijambo cyangwa ububasha muri aka karere.
Ifungurwa ry’iyi nzira, n’ubwo rikiri mu bihe by’igerageza, rifatwa nk’intambwe ikomeye iganisha ku gusubiza Minembwe mu buzima busanzwe, ritanga icyizere ko amahoro n’iterambere bishobora kongera gushinga imizi muri aka gace kamaze igihe kirekire kibasiwe n’ibibazo by’umutekano muke.
