Ikambi y’impunzi z’Abanye-kongo mu Burundi yabonetsemo abarwaye ubushita bw’inkende
Ikambi y’impunzi z’Abanyekongo ya Nyenkanda iherereye muri Komine ya Ruyigi, mu ntara ya Buhumuza, mu gihugu cy’u Burundi, yabonetsemo abarwayi babiri barwaye indwara y’ubushita bw’inkende (Impax).
Mu cyumweru gishize ni bwo abarwaye iki cyorezo cya Mpox bagaragaye muri iyi nkambi, nk’uko amakuru ava muri iki gihugu abivuga.
Aya makuru akavuga ko ikigo nderabuzima cyo muri iyi nkambi icyumbikiwemo impunzi z’Abanyekongo zirenga 19,000, ni cyo cyatoye abarwaye iki cyorezo gifatwa nk’ikiri mu bikomeye.
Ishirahamwe rya Health TPO rikorera muri iyi kambi, ryahise ryongera ibikorwa byaryo no gukurikirana abatowemo icyo cyorezo.
Rinavuga ko abanduye iki cyorezo barangwa no kugira “ubushuhe bwinshi, kubabara cyane, no kugira ibishute ku mubiri.”
Ikindi n’uko iri shirahamwe rya Health TPO rihamagarira impunzi n’abanyagihugu baturiye hafi n’iyi kambi kubahiriza cyane amabwiriza y’isuku mu bice bihuriramo abantu, nko mu ngo n’ahandi hantu hateranira abantu benshi.
