Imirwano ikaze muri Masisi: FRN yigaruriye uduce twinshi, imirwano irakomeje hagati y’impande zihanganye
Minembwe Capital News (MCN)
Imirwano ikomeye yahanganishije abasirikare b’ihuriro rya FRN n’ingabo zishyigikiye ubutegetsi bwa Kinshasa mu Ntara ya Kivu y’Amajyaruguru, yasize uduce twinshi tugenzurwa n’uruhande rwa FRN, mu gihe umutekano ukomeje kuzamba mu bice bya Teritwari ya Masisi na Walikale, mu Burasirazuba bwa Repubulika Iharanira Demokarasi ya Congo.
Amakuru aturuka muri ibyo bice agaragaza ko mu ijoro ryo ku wa Gatatu rishyira kuri uyu wa Kane, tariki ya 05/11/2026, habaye imirwano ikomeye mu gace ka Masisi, yahuje abasirikare ba FRN n’ihuriro ry’ingabo zirwanirira ubutegetsi bwa Repubulika Iharanira Demokarasi ya Congo.
Iri huriro rigizwe n’ingabo za Leta (FARDC), imitwe ya Wazalendo, FDLR ndetse n’abacanshuro, nk’uko amakuru y’ibanze abivuga.
Amakuru aturuka ku baturage bo muri ako gace avuga ko iyo mirwano yatangiye ku wa Kabiri, tariki ya 03/11/2026. Muri iyo mirwano, ingabo za FARDC zifatanyije n’iza Wazalendo zavuzweho guhunga, ziva mu bice bya Mirindano, Mahanga na Kilongo.
Nyuma yo kwigarurira ibyo bice, abasirikare ba FRN bakomeje kwerekeza ku bindi birindiro byari bifitwe n’ingabo za FARDC n’abo bafatanyije.
Ku mugoroba wo ku wa Gatatu, imirwano yongeye gukaza umurego mu nkengero za Mahanga, Kilongo na Kibanda, aho impande zombi zimaze amasaha arenga 24 zihanganye mu mirwano ikomeye.
Ibyo bice byabereyemo imirwano biherereye hafi y’umupaka utandukanya Teritwari ya Masisi na Walikale, mu Ntara ya Kivu y’Amajyaruguru.
Amakuru aturuka muri ako karere avuga ko, kugeza ubu, FRN ikomeje kugenzura ibyo bice, birimo Kazinga na Kasopo, iherereye mu gace ka Osso Banyungu.
Abaturage bakomeje guhura n’ingaruka z’intambara
Uretse ibibazo by’umutekano, ikibazo cy’ubutabazi na cyo gikomeje gufata indi ntera muri ako karere.
Abahagarariye sosiyete sivile muri ibyo bice bavuga ko imirwano yatumye abaturage benshi bahunga ingo zabo, mu gihe ibihumbi by’abaturage bahuye n’ingaruka zayo bikomeje kubura ubufasha bw’ibanze n’ubutabazi.
Ibi bibaye mu gihe uduce duhana imbibi na Teritwari za Masisi na Walikale dukomeje kurangwa n’imirwano, bigatuma umutekano w’abaturage ukomeza guhungabana.
Minembwe Capital News (MCN)