Imirwano ikaze yavuzwe kuri uyu wa mbere i Masisi.
Havuzwe imirwano ikomeye kuri uyu wa mbere tariki ya 13/01/2025 mu gace ka Mufunzi, hafi na Ngungu muri teritware ya Masisi mu Ntara ya Kivu y’Amajyaruguru.
Nk’uko amakuru aturuka muri ako gace abitangaza, ingabo za RDC zimaze iminsi zigerageza kugaba ibitero mu birindiro bya M23 biherereye i Ngungu, mu rwego rwo kugira ngo zisubije uyu mujyi uri muri teritware ya Masisi wigaruriye n’uwo mutwe mu mwaka ushize.
Uyu munsi naho, aya makuru avuga ko habaye imirwano ikaze, kandi ko yatangiye igihe c’isaha umunani z’igicamunsi ku masaha yo mu Burasirazuba bwa Repubulika ya demokarasi ya Congo.
Ni imirwano bivugwa ko nayo yaberaga mu nkengero za Ngungu aho yumvikanyemo urusaku rw’imbunda ziremereye n’izito.
Iyi mirwano ije ikurikira iyabaye ahar’ejo tariki ya 12/01/2025 ikaba yaraberaga mu duce twinshi two muri iyi teritwari ya Masisi no muri teritware ya Nyiragongo hafi n’umujyi wa Goma.
Ahandi habereye urugamba rukomeye hagati y’uyu mutwe n’ihuriro ry’Ingabo zirwana ku ruhande rwa Leta ni muri pariki ya Virunga.
