Impungenge Zirushaho Kwiyongera i Bujumbura: Rev. Sebineza Yafashwe, Dore Aho Yafatiwe n’Ibyatangajwe n’Abatanze Amakuru
Minembwe Capital News (MCN)
Mu gihe hakomeje kuvugwa ifatwa ry’Abanyamulenge baba i Bujumbura, umurwa mukuru w’u Burundi, amakuru mashya Minembwe Capital News (MCN) yahawe n’abantu bari muri uwo mujyi aravuga ko Reverend Pasiteri Sebineza Pitie na we yafashwe n’abapolisi bo mu rwego rwa Documentation, rushinzwe iperereza mu Burundi, kuri iki Cyumweru, tariki ya 18/10/2026.
Abatanze aya makuru babwiye MCN ko Reverend Pasiteri Sebineza Pitie yafatiwe mu gace ka Mutakura, ku Muhanda wa 7, aho yari atuye ndetse hakaba ari na ho urusengero rwe ruherereye.
Bakomeza bavuga ko ifatwa rye ryabaye nyuma y’uko amateraniro ya mbere yari arangiye. Ngo ni bwo imodoka y’abapolisi yahageze, abo bapolisi bakamutwara.
Iri fatwa rije rikurikira andi makuru y’ifatwa ry’Abanyamulenge barenga icumi mu kwezi kwa Cyenda k’uyu mwaka, barimo abapasiteri n’abandi bantu.
Aya makuru akomeje guteza impungenge ku mutekano n’ubwisanzure bw’Abanyamulenge baba i Bujumbura, cyane cyane muri iki gihe hakomeje kuvugwa ifatwa ry’abamwe mu bagize uwo muryango.
Icyakora, kugeza ubu, Minembwe Capital News (MCN) ntirabona itangazo ry’inzego zibishinzwe ryemeza ku mugaragaro ifatwa rya Reverend Pasiteri Sebineza Pitie.
Minembwe Capital News (MCN)