Indege z’Intambara za RDC n’u Burundi zateye ibisasu i Kaziba, Ibitaro n’Inyubako z’Abaturage birangirika
Amakuru yizewe agera kuri Minembwe Capital News kuri uyu wa Kane, tariki ya 04/12/2025, yemeza ko indege za gisirikare za Repubulika ya Demokarasi ya Congo (RDC) zifatanyije n’iz’u Burundi, zateye ibisasu mu bice by’ahitwa Kaziba, muri teritware ya Walungu, mu Ntara ya Kivu y’Amajyepfo.
Abaturage baho batangaje ko ibisasu byaturikijwe n’indege zo mu bwoko bwa Sukhoi-25 byagabwe mu duce tubiri dutandukanye: Qurtier Burhere na *Qurtier Mucinga. Muri Mucinga, kimwe mu bisasu cyaturikiye ikigo cy’ibitaro, gisenya igice kinini cy’inyubako, ibintu byateje impagarara n’ubwoba mu baturage bahaturiye.
Umwe mu batuye muri ako gace yagize ati:
“Ibisasu byatewe na za ndege byasenye ibitaro bya Mucinga bikomeye. Nta mirwano yahaberaga. Abaturage ni bo baguye mu kaga.”
Izi ndege zagaragaye mu kirere cya Kaziba mu masaha ya mu gitondo, nyuma y’uko ku wa Kabiri tariki ya 02/12, ibindi bisasu byari byatewe mu bice byegereye, nabwo bigahitana ibikorwa remezo n’imitungo y’abaturage.
Abashinzwe kurengera uburenganzira bwa muntu barasaba iperereza ryihuse ku byabaye, banasaba ko ibitero nk’ibi bihagarara kuko bihitana ubuzima bw’abasivili b’inzirakarengane kandi bikangiza serivisi z’ingenzi nk’ubuvuzi.
Ibi bitero byaje mu gihe imirwano hagati ya AFC/M23 n’ingabo za Leta ya Congo ifatanyije n’ingabo z’u Burundi, FDLR na Wazalendo, ikomeje gufata indi ntera mu bice bitandukanye bya Kivu y’Amajyepfo.