Intambara Idashira muri Minembwe: Abaturage Bavuga ko Bakomeje Kwibasirwa Bazira Uko Baremwe
Mu gihe uburasirazuba bwa Repubulika Iharanira Demokarasi ya Congo bukomeje kurangwa n’umutekano muke n’intambara zimaze imyaka myinshi, abaturage b’Abanyamulenge bakomeje kugaragaza impungenge z’uko bakomeje kugabwaho ibitero bihoraho bibibasira nk’itsinda rishingiye ku nkomoko yabo.
Amakuru aturuka mu misozi ya Minembwe no mu bice bikikije Mikenke aravuga ko kuri uyu munsi hongeye kubaho imirwano ikomeye mu duce twa Mikenke, Kalingi, Bidegu na Kalongi, aho ihuriro ry’ingabo za FARDC rifatanyije n’ingabo z’u Burundi ndetse n’imitwe ya Wazalendo ryagabye ibitero ku mihana ituwe n’Abanyamulenge.
Abaturage bo muri ibyo bice bavuga ko ibi bitero bikomeje gufata indi ntera, cyane cyane kubera ko ahenshi bigabwa ku baturage basanzwe aho kwibasira imitwe yitwaje intwaro ivugwa na Leta ya Kinshasa. Bamwe mu baturage bavuga ko imyaka irenga icumi ishize bagenda bahura n’ihohoterwa rikomeye ririmo kwicwa, kunyagwa amatungo, gutwikirwa no gusamburirwa amazu, ndetse no guhunga ibyabo kubera umutekano muke ukomeje kubibasira.
Nk’uko amakuru ava muri ako karere abivuga, ibitero byagabwe kuri uyu munsi muri Mikenke, Kalingi, Bidegu na Kalongi byasubijwe inyuma n’abasirikare ba MRDP-Twirwaneho, umutwe uvuga ko wahagurutse ugamije kurinda abaturage b’Abanyamulenge n’uturere batuyemo. MRDP-Twirwaneho ivuga ko buri gihe iyo hagabwe ibitero ku baturage, ihita itabara kugira ngo isubize inyuma ababitera no kurinda abasivile.
Amakuru kandi akomeza avuga ko uruhande ruri ku ruhande rwa Leta ya Kinshasa ari rwo rwatangije ibi bitero, nk’uko byagenze no ku munsi w’ejo ku wa Gatatu, ubwo FARDC n’abambari bayo bagabaga ibitero muri Kalingi, Bidegu n’ahandi hafi ya Minembwe Centre. Icyo gihe na bwo MRDP-Twirwaneho yavuze ko yashoboye kubisubiza inyuma nyuma y’imirwano yamaze amasaha menshi.
Mu bice byinshi bya Minembwe, abaturage bavuga ko ikibazo cy’umutekano cyamaze gufata isura y’ihohoterwa rishingiye ku moko n’inkomoko, aho bavuga ko bakomeje kugabwaho ibitero bazizwa kuba ari Abanyamulenge. Aba baturage bavuga ko ibyo bitero byagiye bisenya imibereho yabo, cyane cyane binyuze mu kunyagwa inka, gusahura imitungo, gutwika amazu no gutuma ibihumbi byinshi by’abaturage biva mu byabo.
Abasesenguzi bamwe bavuga ko ikibazo cy’umutekano muke muri Kivu y’Amajyepfo gikomeje kurushaho gukomera kubera ubufatanye buri hagati ya FARDC n’imitwe yitwaje intwaro irimo Wazalendo, ibintu bikomeje guteza impaka ku ruhare rwa Leta ya Kinshasa mu kurinda abaturage bose nta vangura.
Mu gihe imirwano ikomeje muri utu duce, abaturage bakomeje gusaba amahanga n’imiryango mpuzamahanga gukurikiranira hafi ikibazo cy’Abanyamulenge, bavuga ko hakenewe igisubizo kirambye gishingiye ku mutekano, ubutabera no kubahiriza uburenganzira bwa buri muturage wa Congo, hatitawe ku bwoko cyangwa inkomoko ye.
