Intambara muri RDC Irushijeho Gukara: FRN Itangaje Ibitero Bikomeye mu Turere Dutandukanye, Minembwe na Bunyakiri Biravugwamo
Minembwe Capital News (MCN)
Umutwe wa politiki n’igisirikare wa Front pour la Refondation de la Nation (FRN) watangaje ko imirwano mu burasirazuba bwa Repubulika Iharanira Demokarasi ya Congo (RDC) yafashe indi ntera, uvuga ko ingabo zibumbiye mu ihuriro rishyigikiye ubutegetsi bwa Kinshasa zagabye ibitero mu bice bitandukanye by’intara za Kivu y’Amajyaruguru na Kivu y’Amajyepfo.
Ibi bikubiye mu butumwa bwatanzwe na Lawrence Kanyuka, Umuvugizi wa FRN, kuri uyu wa Gatanu, tariki ya 20/11/2026. Muri ubwo butumwa, yagaragaje uko uyu mutwe ubona uko ibintu byifashe ku rugamba, anatangaza ibitero bitandukanye uvuga ko byagabwe ku baturage no ku birindiro byawo.
Mu itangazo rye, Kanyuka yavuze ko intambara ashinja ubutegetsi bwa Kinshasa gukomeza gushyigikira imaze kwaguka, ikaba irimo gukoresha ibikoresho bya gisirikare birimo indege zitagira abapilote zikoreshwa mu ntambara (Combat Drones), indege z’intambara, kajugujugu, imbunda ziremereye n’ingabo zirwanira ku butaka.
Yavuze ko izo ngabo zirimo abasirikare ba FARDC, abacanshuro, ingabo z’u Burundi, abarwanyi ba FDLR n’imitwe ya Mai-Mai izwi nka Wazalendo. Kanyuka ashinja iryo huriro kugaba ibitero bigamije kwibasira abaturage b’abasivili.
Ibitero byatangajwe na FRN
Mu bisobanuro yatanze, Lawrence Kanyuka yavuze ko ku wa Kane, tariki ya 19/11/2026, ahagana saa 23:00, abarwanyi ba FDLR, bafashijwe n’umutwe wa Nyatura, binjiye mu gace ka Lusowa, gaherereye i Kanyabayonga, muri Teritwari ya Rutshuru, mu Ntara ya Kivu y’Amajyaruguru.
Yavuze ko abo barwanyi barashe abaturage, hapfa abantu batandatu (6).
Yakomeje avuga ko mu rukerera rwo kuri uyu wa Gatanu, tariki ya 20/11/2026, guhera ahagana saa 05:45, ingabo zibumbiye mu ihuriro rishyigikiye ubutegetsi bwa Kinshasa zagabye ibitero bikomeye, zikoresheje imbunda ziremereye, mu duce twa Buhimba na Kinyumba, muri Teritwari ya Masisi, mu Ntara ya Kivu y’Amajyaruguru.
Kanyuka kandi yavuze ko nyuma yaho ibyo bitero byakomeje gukaza umurego mu bice bitandukanye.
Yagaragaje ko:
- Saa 06:00: Hagaragaye igitero cyagabwe mu gace ka Chambombo, muri Teritwari ya Kalehe, mu Ntara ya Kivu y’Amajyepfo.
- Saa 06:10: Hafunguwe undi murongo w’imirwano, ubwo hagabwaga igitero kuri Bunyakiri, muri Teritwari ya Kalehe, mu Ntara ya Kivu y’Amajyepfo.
- Saa 06:15: Ibitero by’imbunda byakajije umurego mu gace ka Point Zéro, mu karere ka Minembwe, mu Ntara ya Kivu y’Amajyepfo.
FRN ivuga ko ingabo zayo ziri mu bikorwa byo kurinda abaturage
Mu butumwa bwe, Umuvugizi wa FRN yavuze ko uyu mutwe udashobora gukomeza kurebera mu gihe abaturage bakomeje guhura n’ibitero n’urugomo, ashinja umuryango mpuzamahanga gukomeza guceceka mu gihe ibyo bikorwa bikomeje.
Yavuze ko ingabo za FRN ziri mu bikorwa bya gisirikare ku butaka bigamije kurinda no kurengera abaturage, mu guhangana n’ibyo yise ibitero byagutse byagabwe mu bice bitandukanye.
Mu gusoza ubutumwa bwe, Lawrence Kanyuka yavuze ko ibitero ashinja ingabo zibumbiye mu ihuriro rishyigikiye ubutegetsi bwa Kinshasa kugaba mu Minembwe, mu ijoro ryo ku wa Kane, tariki ya 19/11/2026, byahitanye abantu, abandi barakomereka. Yongeyeho ko ibyo bitero byangije amazu, ibigo by’amashuri n’ibindi bikorwa remezo.
Minembwe Capital News (MCN)
