Intambara yabaye uyu munsi yahaye FARDC n’abambari bayo isomo rikaze.
Amakuru ava muri teritwari ya Masisi avuga ko kuri uyu wa gatanu tariki ya 03/01/2025, habaye urugamba rukaze hagati ya m23 n’ihuriro ry’Ingabo za Repubulika ya demokarasi ya Congo, uru ruhande rwa Leta rukaba rwayitakajemo abagera ku 135.
Iyi mirwano yabereye mu duce turimo Gatuvu, Kibuye no mutundi duce duherereye muri cheferi ya Kamuronza.
Kamuronza iherereye hejuru ya centre ya Bwerimana hafi y’u mujyi wa Sake uri mu birometero nka 27 uvuye ku murwa mukuru w’i ntara ya Kivu y’Amajyaruguru, Goma.
Ni imirwano kandi yumvikaniye muri Katale aho umutwe wa m23 wigaruriye, aha akaba ari hafi no kuri zone ya Masisi.
Aya makuru akavuga ko imirwano yabaye kuri uyu munsi yumvikanyemo urusaku rw’imbunda rwinshi, ndetse ko ihuriro ry’Ingabo za RDC ryarikubitiwemo bikomeye.
Iyi mirwano ije ikurikira iyabaye ahar’ejo aho yabereye muri Lokopfu na Kaniro, ndetse yasize uyu mutwe wa m23 wigaruriye utwo duce.
Ni amakuru kandi avuga muri urwo rugamba rwabaye none, uruhande rwa Leta, rwayitakajemo abagera kuri 135 kandi ko bashobora kurenga. Barimo abo muri FDLR, Wazalendo na FARDC.
Abarwanyi bo mu mutwe wa m23 bavuze ko FARDC n’abambari bayo baburiye ubuzima muri iyo mirwano baturukaga kuri Zone ya Masisi kandi ko ahanini bapfuye ubwo bageragezaga guhunga.
