Iran yagabye igitero gikaze i Tel Aviv.
Igisirikare cya Iran cyateye ibisasu ahantu hatandukanye mu mujyi wa Tel Aviv wo muri Israel no mu bice by’i Golan, ariko Israel na yo yakomeje kurasa i Tehran muri Iran.
Mu ijoro ryaraye rikeye rishyira kuri uyu wa gatatu tariki ya 18/06/2025, ibitero bigira umunsi wa gatandatu hagati y’ibihugu byombi bihanganye byakomeje.
Iran yaje gutahura ahantu Israel ikorera za drones zikozwe n’intasi za Mossad, ihita irasa indege nini ya drone ya Israel yo mu bwoko bwa Hermes type UAV ikoreshwa mu kugaba ibitero. Iyi ndege ni imwe mu zigezweho zikorwa na Israel, ifite agaciro kabarirwa hagati ya miliyoni 18$ na miliyoni 30$.
Israel na yo itera ibisasu kuri kaminuza yitwa Imam Hussein i Tehran. Iran ihita yihorera irasa ishuri ryo muri Israel rya Weizmann institute.
Andi makuru akomeye kuri iyi ntambara ni amagambo yatangajwe na perezida Donald Trump, mbere yari yasabye Iran kumanika amaboko nta yandi mananiza, anavuga ko bagenzura ikirere cya Iran, ndetse ko Iran idafite ibikoresho bikomeye nk’ibya Amerika. Trump yongeye gutangaza ko amahirwe yo kwifata ngo Amerika ntijye gufasha Israel agenda agabanuka.
Nyamara ku rundi ruhande, aba Houthi bo muri Yemen bavuze ko Amerika niyinjira mu ntambara bazarasa ku bikorwa remezo byayo.
Ndetse kandi Iran ishobora gutangira kurasa ku ngabo za Amerika aho zifite ibirindiro, nk’uko iheruka kubitangaza.
Indege za Amerika zitwara petrol ziri kwerekeza mu karere k’u Burasizuba bwo hagati zivuye i Burayi. Amakuru aravuga ko ingabo za Amerika ziba mu bihugu bitandukanye bituranye na Iran ziryamiye amajanja.
Mu bitero Iran yagabye kuri Israel, ntiharamenyekana abo byahitanye ariko imbugankoranyambaga zikorera mu kwaha k’u butegetsi bwa Iran zagaragaje amashusho atandukanye y’i Tel Aviv harimo gushya.
Byari binabaye n’ubwa mbere Iran itangaza ko yakoresheje misile yayo yihuta yo mu bwoko bwa Fatth-1.
Ni mu gihe Iran imaze kurasa misile 400 kuri Israel, izigera kuri 40 zaguye ku butaka izindi Israel yarazishywanuaguje. Abantu 24 bamaze gupfa, abagera kuri 800 barakomereka.
Naho muri Iran hamaze gupfa abantu 450 harimo abasirikare bakuru b’iki gihugu.
