Iyicwa ry’Umwarimu wa Kaminuza i Kinshasa Ryatumye Ibikorwa Bimwe Bihagarara
Nyuma y’urupfu rubabaje rw’umwarimu Mathieu Abata, wigishaga muri Kaminuza ya Kinshasa (UNIKIN), wishwe n’abagizi ba nabi bitwaje intwaro bamusanze iwe mu rugo mu ijoro ryo ku wa Gatatu rishyira ku wa Kane, tariki ya 08/01/2026, muri komini ya Lemba, Ishyirahamwe ry’Abarimu ba Kaminuza ya Kinshasa (APUKIN) ryatangaje ko ryahise rihagarika by’agateganyo ibikorwa byaryo byose.
Mu itangazo ryashyizwe ahagaragara, APUKIN ryavuze ko ryashenguwe bikomeye n’iri yicwa ryiswe “iry’ubugwari n’ubunyamaswa,” bityo batangaza ko hateganyijwe Inama Rusange Idasanzwe ku wa Gatanu tariki ya 09/01/2026, ikaba yarabereye ku cyicaro cyaryo. Banagaragaza ko ibikorwa byose by’iri shyirahamwe byahagaritswe.
Itangazo ryabo rigira riti:
“APUKIN ibabajwe bikomeye n’iyicwa ry’umwarimu Abata. Kubera iyo mpamvu, hateganyijwe Inama Rusange Idasanzwe. Mu gihe hagitegerejwe imyanzuro izayivamo, ibikorwa byose by’ishyirahamwe birahagaritswe.”
Ku rundi ruhande, bagaragaje ko basuye urugo rw’umuryango wa nyakwigendera, baganira n’umukobwa we Rosette Abata, umuforomokazi, wari ugihungabanye cyane. Yasobanuye ko abagizi ba nabi bagose urugo ahagana saa tanu z’ijoro, mu gihe abagize umuryango bose bari basinziriye. Yavuze ko yabyukijwe n’urusaku rw’ingufuri zamenagurwaga n’ibikangisho abitwaje intwaro bakoreshaga, asobanura ko bakoresheje isasu mu gufungura Ingufuri ku muryango w’inzu.
Nk’uko yakomeje abivuga, se yarashwe hifashishijwe imbunda itumvikana, nyuma yo kugerageza gutabaza umugore we wari uri gukorerwa ihohoterwa rikabije, kandi ubuzima bwe busanzwe butari bumeze neza.
Uwitwa Jean-Bruno, wari utuye muri urwo rugo, yavuze ko mu gitondo cyo ku wa Kane, ubwo abaturage bari bateraniye aho ibyo byabereye, abana ba nyakwigendera batangajwe no kubona umwe mu bagize uruhare muri ubwo bwicanyi agarutse aho icyaha cyakorewe. Nyuma yo kumenyekana, abaturage bamufashe baramukubita bikabije kubera uburakari, bamufungira mu nzu ya Jean-Bruno amasaha agera kuri atatu bategereje ko polisi ihagera.
Kubera uburakari bukabije bw’abaturage, baje kumena umuryango w’iyo nzu, maze uwo mugizi wa nabi bamwica bamutwitse n’umuriro.
Abana ba nyakwigendera, umuryango we n’abaturage bo muri ako gace bagaragaje akababaro kabo batewe n’uko nta butabazi bwa polisi bwigeze bugera aho icyaha cyabereye, nyamara igikorwa cy’ubugizi bwa nabi cyakozwe hafi amasaha arenga abiri yose.
Ibi bibaye mu gihe umujyi wa Kinshasa ukomeje kwibasirwa n’ubwiyongere bukabije bw’umutekano muke. N’ubwo inzego z’umutekano zikomeza gutangaza imibare y’abatawe muri yombi mu bikorwa byo kurwanya ubugizi bwa nabi, by’umwihariko mu gikorwa cyiswe “Ndobo,” abaturage bagaragaza ko umutekano ugikomeje kuba ikibazo gikomeye, polisi ikagaragara nk’idafite ibikoresho n’ubushobozi bihagije byo kurinda abaturage n’imitungo yabo.
Iyicwa ry’umwarimu Mathieu Abata rikomeje kubyutsa impaka zikomeye ku mutekano w’abanyeshuri, abarimu n’abaturage muri rusange, ndetse rinongera igitutu ku buyobozi kugira ngo hafatwe ingamba zifatika zo gukumira ubugizi bwa nabi bukomeje gufata indi ntera mu murwa mukuru wa Repubulika Iharanira Demokarasi ya Congo.
