Justin Bitakwira wabaye minisitiri ushinzwe iterambere ry’icyaro muri Repubulika ya demokorasi ya Congo, yatukanye mu ruhame imbere ya perezida Félix Tshilombo.
Hari mu Nama idasanzwe y’abanyamuryango b’ihuriro union sacrée rigizwe n’amashyaka ashyigikiye ubutegetsi bwa Tshilombo, yateranye tariki ya 17/05/2024.
Muri iyi Nama Justin Bitakwira yavuze ko aho kugira ngo Christophe Mbosso agaruke ku buyobozi bw’umutwe wa w’abadepite, byarutwa n’uko icyorezo cya COVID-19 cyagaruka.
Iri gereranya Bitakwira umenyereweho amagambo y’ivangura rishingiye ku moko, ya bivuze mu gihe hari habaye umwuka mubi, ubwo bari bamaze gutanga ingingo ziganirwaho . Uyu mwuka mubi ukaba wari watewe ahanini no kutemeranya kubakwiye kujya muri Guverinoma n’abayobora imitwe yombi y’inteko ishinga amategeko.
Mbosso uherutse gutorerwa kuyobora akanama k’inararibonye yari mu bashakaga kuyobora umutwe w’abadepite, ariko Vital Kamerhe wo mu ishyaka UNC akaba na minisitiri ushinzwe ubukungu niwe washyigikiwe n’abanyamuryango benshi.
Umukuru w’igihugu Tshisekedi yamenyesheje abanyamuryango b’iri huriro, ko uyu mwiryane nukomeza, ashobora no kuzafata icyemezo cyo gusesa inteko ishinga amategeko.
Justin Bitakwira nawe yaje gufata ijambo, agaragaza ko bikwiye ko Mbosso atongera kuyobora umutwe w’abadepite, kuko ingaruka mbi ubuyobozi bwe bwagira zaba ziremereye kurusha izo icyorezo cya COVID-19 cyateza kibaye cyongeye kugaragara muri RDC.
Yagize ati: “Abantu bacu biteguye kugaruka kwa COVID-19, mu mwanya wo kugaruka kwa bwana Mbosso mu buyobozi bw’inteko inshinga amategeko.”
Amatora y’abadepite yabaye mu kwezi kwa cumi nabiri umwaka ushize, bitangazwa mu kwezi kwa mbere uyu mwaka . Muri Guverinoma, Tshisekedi yagize Judith Suminwa kuba minisitiri w’intebe tariki ya 01/04/2024. Ntabwo igihe izi nzego zizuzurizwa cyari cyamenyekana.
MCN.
