Kabila Avuze Ijambo Rikomeye ku Ntambara ya RDC, Asiga Kinshasa mu Rujijo!
Minembwe Capital News (MCN)
Perezida w’ihuriro rya politiki n’igisirikare rya Front pour la Refondation de la Nation (FRN), Joseph Kabila, yanenze ikoreshwa ry’abacanshuro b’abanyamahanga mu ntambara iri kubera muri Repubulika Iharanira Demokarasi ya Congo (RDC), avuga ko ari uburyo budakwiriye kandi bushobora gushyira abaturage mu kaga. Icyakora, yashimangiye ko ibyo bitazabuza FRN kugera ku ntego zayo.
Mu butumwa bwe, Kabila yavuze ko mu makimbirane yose RDC yanyuzemo, atigeze atekereza gukoresha abacanshuro, kuko yemeraga ko inshingano zo kurinda umutekano w’igihugu zigomba mbere na mbere gushyirwa mu maboko y’abana bacyo, aho gushingira ku banyamahanga bahembwa kugira ngo barwane.
Yasobanuye ko n’igihe ibisubizo bya politiki byabaga bitaraboneka, bakomeje gushimangira ko Abanyekongo ubwabo ari bo bakwiye kugira uruhare rukomeye mu kurinda igihugu cyabo.
Ku bijyanye n’amafaranga ubutegetsi bwa Kinshasa bukoresha mu gushaka no guhemba abacanshuro, Kabila yavuze ko ashobora kuba arenze ingengo y’imari igihugu kigenera ingabo zacyo mu rwego rw’ubwirinzi.
Yongeyeho ko FRN itashyigikiye ikoreshwa ry’abacanshuro muri RDC, cyane cyane ko Umuryango w’Abibumbye (ONU) n’Umuryango wa Afurika Yunze Ubumwe (UA), nk’uko yabivuze, bagaragaje ko batashyigikiye iyo mikorere.
Yibukije kandi ko Umuryango wa Afurika Yunze Ubumwe ufite umwanzuro ugamije kurwanya ikoreshwa ry’abacanshuro ku mugabane wa Afurika, ariko ashimangira ko ubutegetsi bwa Kinshasa butigeze bwubahiriza uwo mwanzuro.
Abajijwe niba ikoreshwa ry’abacanshuro rishobora guteza abaturage ba RDC ibyago bikomeye, Kabila yemeye ko bishoboka. Icyakora, yahakanye ko ibyo bishobora kubera inzitizi FRN mu kugera ku ntego zayo.
Mu gusoza, Kabila yavuze ko ibihe RDC irimo bisaba impinduka zikomeye mu buryo abantu babona kandi basobanura ibibazo by’igihugu. Yashimangiye ko guhindura imyumvire ari ingenzi kugira ngo haboneke inzira nshya yo gukemura ibibazo igihugu gihanganye na byo.
Aya ni amagambo ya Joseph Kabila, Perezida wa FRN, agaragaza imyitwarire y’iri huriro ku ikoreshwa ry’abacanshuro muri RDC, ndetse n’uko ribona ikibazo cy’umutekano n’impinduka rikomeje gusaba mu miyoborere y’igihugu.
Minembwe Capital News (MCN)