Kabila Yashinje Ubutegetsi bwa Tshisekedi Gutsimbataza Amacakubiri muri RDC

Minembwe Capital News (MCN)

Joseph Kabila wahoze ari Perezida wa Repubulika Iharanira Demokarasi ya Congo (RDC), yongeye kunenga imiyoborere y’uwamusimbuye, Félix Tshisekedi, ayishinja guteza imbere ivangura rishingiye ku moko, gukoresha ubutegetsi mu nyungu za politiki no gushyira imbere inyungu z’abantu bake aho kwita ku mibereho y’abaturage.

Mu itangazo yashyize ahagaragara ku mugoroba wo ku wa Gatanu, tariki ya 09/10/2026, Kabila yagarutse ku bibazo rusange igihugu kirimo, agaragaza ko, mu myumvire ye, RDC yongeye kwinjira mu bihe by’imiyoborere irangwa n’igitugu, ivangura n’isenyuka ry’ubumwe bw’igihugu.

Kabila ashinja ubutegetsi gushyira imbere amoko n’inyungu z’abafitanye isano

Mu butumwa bwe, Kabila yavuze ko ubutegetsi buriho burangwa n’ibyo yise gusubiza igihugu mu nzira y’igitugu. Yavuze ko nyuma y’uko ubutegetsi bw’igitugu bwatsinzwe ku wa 17/05/1997, bwongeye kugaruka mu buryo abona ko buteye inkeke.

Yashinje ubutegetsi bwa Tshisekedi gushimangira ivangura rishingiye ku moko, gushyira imbere bene wabo n’abafitanye isano mu kugabana imyanya n’inyungu, ndetse no guheza no gusebya amatsinda amwe y’abaturage, cyane cyane abo abona ko ari bake mu gihugu.

Kabila yanenze kandi ibyo yise gukoresha inzego za Leta mu nyungu za politiki. Yavuze ko imiyoborere y’igihugu isa n’iyibanda cyane ku gukomeza ubutegetsi buriho kurusha gukemura ibibazo by’abaturage.

Avuga ko ubukene n’umutekano muke byangije ubumwe bw’igihugu

Kabila yakomeje kunenga imiyoborere y’igihugu, ayishinja gufata Leta n’umutungo rusange nk’ibintu bigenewe inyungu z’abantu ku giti cyabo cyangwa iz’itsinda runaka.

Yavuze ko iyo myitwarire, nk’uko ayibona, yagize uruhare mu gukomeza ubukene, gusenya ubumwe bw’igihugu no kongera amakimbirane ashingiye ku moko atandukanye.

Yagaragaje ko amahoro, kubana mu bwumvikane n’ubufatanye hagati y’Abanyekongo byasimbuwe n’amakimbirane, umutekano muke n’intambara.

Mu magambo ye, Kabila yavuze ko imiyoborere idahwitse kandi itajyanye n’igihe yagize ingaruka zikomeye ku bumwe bw’igihugu, ku mahoro no ku mibereho y’abaturage.

Imvugo ya Kabila yongeye gukaza impaka ku miyoborere ya RDC

Iri tangazo rije nyuma y’igihe kirenga umwaka Kabila atangaje ubutumwa bwe bwa nyuma ku gihugu, bwo ku itariki ya 23/05/2025.

Nubwo Kabila atavuze izina rya Félix Tshisekedi mu buryo butaziguye muri ibyo birego, ibikubiye mu butumwa bwe byibanze ku kunenga imiyoborere y’ubutegetsi buriho.

Itangazo rya Kabila ryongeye kugaragaza umwuka w’amakimbirane ya politiki muri RDC, aho imiyoborere, uburenganzira bw’abaturage, ubumwe bw’igihugu n’umutekano bikomeje kuba bimwe mu bibazo bikomeye biri mu mpaka za politiki.

Minembwe Capital News (MCN)