Kabuya yakiriye intumwa z’Abanyamulenge bakorera mu kwaha k’ubutegetsi bw’i Kinshasa: byinshi ku byaganiriweho
Umunyamabanga Nshingwabikorwa w’Igihugu w’Ishyaka UDPS, Augustin Kabuya, yakiriye ku Cyumweru iwe i Kinshasa delegasiyo y’Abanyamulenge bakorera mu kwaha k’ubutegetsi bwa Repubulika Iharanira Demokarasi ya Congo (RDC), iyobowe n’Umudepite Rukema Lévis.
Iyi nama yabaye mu gihe muri RDC hakomeje kugaragara impaka zikomeye ku bijyanye n’imvugo za politiki zishobora kugira ingaruka ku bumwe bw’Abanyekongo, ku mutekano w’abaturage ndetse no ku moko atandukanye.
Imvugo za politiki zateje impungenge
Mu biganiro byahuje Augustin Kabuya na delegasiyo y’Abanyamulenge, yari irimo Rukema Lévis, kimwe mu byibanzweho ni impungenge z’imvugo zimwe na zimwe z’abanyapolitiki, izo iyi delegasiyo ifata nk’izishobora gushyira Abanyamulenge mu kato, kubashyira ku ruhande cyangwa kongera kubatera isura mbi mu bandi baturage.
Delegasiyo yari iyobowe na Rukema Lévis yagejeje kuri Kabuya uburakari n’impungenge byayo ku birebana n’amagambo atandukanye yagiye atangazwa n’abanyapolitiki bo muri RDC, by’umwihariko amagambo aheruka gutangazwa na Martin Fayulu, umunyapolitiki utavuga rumwe n’ubutegetsi.
Fayulu avugwaho amagambo yavugiye i Bruxelles mu Bubiligi, aho yanenze cyane Abanyamulenge ndetse anavuga ko batazwi nk’Abanyekongo.
Abari muri iyi delegasiyo bagaragaje ko imvugo nk’izi zishobora kugira ingaruka zirenze impaka zisanzwe za politiki, cyane cyane mu gihe igihugu kigikomeje guhura n’ibibazo by’umutekano, amakimbirane ashingiye ku butaka ndetse n’amoko.
Kabuya: “Natunguwe n’imvugo ya Martin Fayulu”
Augustin Kabuya yavuze ko na we yatunguwe n’imvugo ya Martin Fayulu, avuga ko umuyobozi wa politiki ufite inshingano nk’ize akwiye kugira uruhare mu kubaka ubumwe bw’Abanyekongo, aho gukoresha imvugo ishobora kubatandukanya.
Kabuya yagize ati:
«“Twakiriye delegasiyo iyobowe na Rukema. Natunguwe n’imvugo ya Martin Fayulu, Perezida w’ishyaka rya politiki nka twe.”»
Kabuya kandi yashimangiye ko ikibazo cy’ubumwe bw’igihugu kigomba kuba inshingano y’abayobozi bose, cyane cyane mu gihe RDC iri mu bihe bya politiki n’umutekano bisaba ubwitonzi mu mvugo no mu bikorwa.
Rukema na bagenzi be basabwe gukomeza kugira icyizere ku gihugu
Mu biganiro, Kabuya yanashatse guhumuriza iyo delegasiyo ku bijyanye n’umutekano wayo ndetse n’umwanya w’Abanyamulenge nk’Abanyekongo.
Yagaragaje ko inzego za politiki zikwiye kugira uruhare mu kurinda abaturage bose ba Repubulika Iharanira Demokarasi ya Congo, hatitawe ku bwoko cyangwa akarere bakomokamo.
Ibi byagarutsweho mu gihe ikibazo cy’amacakubiri ashingiye ku bwoko gikomeje kuba kimwe mu bibazo bikomeye muri politiki n’umutekano wa RDC, cyane cyane mu burasirazuba bw’igihugu, aho amakimbirane yagiye ahuza imitwe yitwaje intwaro, abaturage ndetse n’inzego z’umutekano.
Rukema Lévis ni we wayoboye delegasiyo
Kuba iyi delegasiyo yaragejeje iki kibazo kuri umwe mu bayobozi bakuru ba UDPS bigaragaza ko Abanyamulenge bakorera mu kwaha k’ubutegetsi i Kinshasa bahisemo gukoresha inzira y’ibiganiro no kwegera inzego za politiki, kugira ngo ibibazo byabo bisobanurwe kandi bigere ku nzego zifite ubushobozi bwo kubikurikiranira hafi.
Ibi bibaye kandi mu gihe bamwe muri bo batangiye kwibaza ku mpamvu batayobotse inzira yo kwirwanaho, ahubwo bagahitamo gukemura ibibazo byabo binyuze mu kuyoboka Leta y’i Kinshasa yabashoyeho intambara.
Nyuma y’iyi nama, Kabuya yavuze ko ibiganiro bitarangiye, ahubwo ko hazakomeza ubujyanama no gukusanya amakuru ku mpungenge zagaragajwe n’iyo delegasiyo yari iyobowe na Rukema Lévis.
Uko ikibazo kizakomeza kunyuzwa mu nzego za politiki
Kabuya yavuze ko hamaze gushyirwaho uburyo bwo gukomeza gukusanya ibitekerezo ku bibazo bireba ibyo iyo delegation yagaragaje.
Yasobanuye ko yaganiriye na Depite Rukema Lévis, amusaba gukomeza kugirana ibiganiro n’abantu batandukanye bo mu Banyamulenge bakorera mukwaha kubutegetsi ndetse n’abandi, kugira ngo hamenyekane neza ibibazo bafite, ibibahangayikishije ndetse n’ibisubizo bifuza, ariko icyo bifuza ni amahoro.
Ni ukuvuga ko, nyuma y’inama yabereye kwa Kabuya, intambwe ikurikiraho ni ugukusanya ibitekerezo byinshi kurushaho, kugira ngo ibibazo byatanzwe bitagarukira ku bitekerezo by’abantu bake bari muri delegasiyo, ahubwo bigaragazwe mu buryo bwagutse.
Nyuma y’ibyo biganiro, Kabuya yavuze ko ibyavuye muri ubwo buryo bwo kugisha inama bizagezwa kuri Perezida wa Repubulika, Félix-Antoine Tshisekedi Tshilombo, kugira ngo harebwe ingamba zikwiye.
