Kaziba: Imirwano Ikomeye Yahinduye Icyerekezo cy’Urugamba, FRN Ifata Kange
Minembwe Capital News (MCN)
Imirwano ikomeye yahuje ingabo za Front pour la Refondation de la Nation (FRN) n’ihuriro ry’ingabo za Repubulika Iharanira Demokarasi ya Congo (RDC) yabereye mu gace ka Kaziba, muri Teritwari ya Walungu, mu Ntara ya Kivu y’Amajyepfo, mu Burasirazuba bwa Repubulika Iharanira Demokarasi ya Congo, kuri uyu wa Gatatu tariki ya 11/11/2026.
Amakuru MCN yahawe n’amasoko ari hafi y’ahabereye imirwano avuga ko yatangijwe n’uruhande rwa FARDC n’abo bafatanyije, bagaba ibitero ku birindiro bya FRN biherereye mu nkengero za Centre ya Kaziba.
Ayo masoko avuga ko nyuma y’imirwano ikomeye, ingabo za FRN zasubije inyuma ibitero zari zagabweho, zinigarurira agace ka Kange. Hagati aho, ingabo z’ihuriro rya FARDC n’abafatanyabikorwa baryo zasubiye inyuma, zerekeza mu mashyamba.
Umwe mu batanze amakuru y’ibanze yagize ati: “Amakuru mashya ni uko ingabo za FRN zafashe Kange.”
Undi mutangabuhamya, na we MCN yakuyeho amakuru yo muri ako gace, yasobanuye uko imirwano yagenze agira ati:
“Habaye imirwano kuva saa kumi n’imwe kugeza saa kumi n’ebyiri z’umugoroba. Uruhande rwa FARDC n’abambari bayo ni bo batangiye kugaba ibitero kuri FRN ku misozi yegereye agace ka Kaziba. Icyakora, FRN yabatsinze, ibasubiza inyuma ibirukana aho bari baturutse. Byarangiye bambuwe ibirindiro byabo bya Kange, bahungira mu mashyamba.”
Kange: Agace gafite akamaro ku miterere y’akarere
Agace ka Kange kavuzwe muri aya makuru gaherereye ku mupaka ugabanya Ngweshi n’i Bupfulero. Ni agace gafite umwanya w’ingenzi mu miterere y’akarere, cyane cyane ku bijyanye n’inzira zihuza ibice bitandukanye by’ako gace.
Amakuru MCN yahawe agaragaza ko umuntu ugenda n’amaguru ashobora kumara iminota igera kuri 20 avuye i Kange agera ku ruzi rwa Ruvubu.
Amaze kugera kuri urwo ruzi, ashobora gukomeza urugendo yerekeza mu Rurambo, agace gatuwe n’Abanyamulenge benshi, mu misozi yo muri Teritwari ya Uvira, mu Ntara ya Kivu y’Amajyepfo.
Iyi miterere y’ahantu igaragaza ko Kange iherereye mu gace gafite amasano y’inzira zihuza Ngweshi, i Bupfulero n’ibice byerekeza mu Rurambo, aho Abanyamulenge benshi batuye.
Imiterere y’urugamba iracyakurikiranwa
Amakuru MCN yamenye, yayamenye binyuze mu masoko yayo agaragaza ko imirwano yabaye kuri uyu wa Gatatu tariki ya 11/11/2026 yarangiye ingabo za FRN zisubije inyuma ibitero zari zagabweho, ndetse zigarurira agace ka Kange, nk’uko ayo masoko abivuga.
Minembwe Capital News (MCN)