Kera Kabaye Muri RDC Hagaragajwe Ibihumbi by’Abapolisi Batemewe
MINEMBWE CAPITAL NEWS (MCN)
Guverinoma ya Repubulika Iharanira Demokarasi ya Congo (RDC) yatangaje ko yashyize ahagaragara raporo nshya igaragaza amakosa akomeye mu micungire y’abakozi ba Polisi y’Igihugu, harimo ibihumbi by’abapolisi batemewe, amazina yanditswe inshuro zirenze imwe, ndetse n’ibindi bibazo by’imiyoborere bikomeje gutwara Leta amafaranga menshi mu mishahara.
Iyi raporo yashyikirijwe abayobozi bakuru ba Leta mu nama yo gukurikirana ivugururwa rya Polisi y’Igihugu ya Congo (PNC), yayobowe na Visi Minisitiri w’Intebe akaba na Minisitiri w’Umutekano n’Ibikorwa by’Imbere mu Gihugu, Jacquemain Shabani. Ni raporo iri mu rwego rwa gahunda ya Guverinoma igamije kunoza imiyoborere, kongera ubunyamwuga mu nzego z’umutekano no kugabanya isesagura ry’umutungo wa Leta.
Raporo igaragaza ko hari umubare munini w’abapolisi batabaho bakomeje kugaragara ku rutonde rw’abahabwa imishahara, abandi bafite amazina yanditswe inshuro zirenze imwe, ndetse hakaba n’inyandiko zirimo amakosa y’imiyoborere n’ubuyobozi. Ibi byose ngo byagize ingaruka zikomeye ku ngengo y’imari ya Leta, cyane cyane ku mishahara igenerwa Polisi y’Igihugu.
Nyuma yo gusuzuma ibyavuye muri iyo raporo, Guverinoma yemeje gutangira icyiciro cy’igenzura ryimbitse rizashingira ku kugenzura buri mupolisi ku giti cye, hifashishijwe uburyo bwo kumusuzuma imbonankubone, kugenzura inyandiko ze z’akazi, ndetse no gukoresha ikoranabuhanga rya biometrie, rishingiye ku bimenyetso ndangamuntu nk’igikumwe n’ibindi bimenyetso by’umubiri.
Abayobozi bavuga ko iri genzura rizafasha kumenya umubare nyawo w’abapolisi bakorera igihugu, aho bakorera n’imiterere y’inyandiko zabo, bityo hakurweho burundu abakozi b’ibihimbano n’ibindi byose byangiza imicungire y’umutungo wa Leta.
Inama yize kuri iyi raporo yanitabiriwe na Visi Minisitiri w’Intebe ushinzwe Abakozi ba Leta, Jean-Pierre Lihau, Minisitiri wa Leta ushinzwe Ingengo y’Imari, Adolphe Muzito, abayobozi bakuru ba Polisi y’Igihugu (PNC), ndetse n’abahagarariye sosiyete Africa Business Agency (ABA), iri gufasha Guverinoma mu bijyanye n’ubuhanga n’ikoranabuhanga muri uyu mushinga wo kuvugurura urwego rwa Polisi.
Nk’uko bikubiye muri iyi raporo, iki gikorwa gifatwa nk’intambwe ikomeye mu gusukura dosiye z’abakozi ba Polisi y’Igihugu, gukuraho amazina y’abapolisi batabaho, gukosora amakosa yose yo mu buyobozi, no kongera umucyo n’ubunyangamugayo mu micungire y’imari ya Leta.
Abasesenguzi bavuga ko, nirangira neza, iri vugurura rizafasha Guverinoma kugabanya amafaranga yatangwaga mu mishahara itari ikwiye, kongera icyizere mu micungire y’inzego z’umutekano, no guteza imbere imiyoborere ishingiye ku mucyo n’uburyozwe.
Iyi gahunda iri mu mavugurura yagutse Guverinoma ya RDC ikomeje gushyira mu bikorwa, agamije kubaka inzego za Leta zikora neza, zirangwa n’ubunyamwuga, ndetse zikoresha umutungo wa rubanda mu buryo buboneye.
